PRESICCESI NEL MONDO

Poesia in dialetto presiccese di VITO STENDARDO

Questa è la seconda parte della poesia di VITO STENDARDO "SantAndrea e lu vecchiareggdu".

O Sant’Andrea, na cosa voiu sacciu

Ca l’aggiu ntisa sempre ieu cuntare:

è veru ca rravati a quarant’anni

na vota li manavene ntra mare?

“Ma lassa stare ca su’ fesserie,

ne teni ottanta, vardete allu specchiu,

a chiri tiempi fora le fatie

se a quarant’anni già parivi vecchiu”.

Nu te ricordi ca tant’anni rretu

la gente ca passava de qua sutta

e a quai su li scaluni se ssattava,

paria ca camanava capisutta...

Ste cose nu be l’iti riscurdare

mo’ ca lu munnu va diversamente

Alli carusi l’iti vui spiecare:

la chianta, la radice e la samente.

Lu sacciu ca se mintene a ridire

se chiri tiempi vui li numanati,

ggdi fatti solamente po’ capire

ci l’hane visti o ciunca l’ha passati;

cci boi lli spiechi a unu d’u domila

com’erene li tiempi de na vota,

de quannu lu petroiu o la cannila

tie te purtavi de na stanza all’otra.

Lu tiempu cancia e nu è mai lu stessu

la gente face ricca o povareggda,

e chiru ca chiamati vui progressu

a mie me rruvanò la focareggda.

“E mo cci pozzu fare, Sant’Andrea,

me trema lu cutursu e le rameggde,

ca ci me davi forza e sanitate

te ne dumava doi de focareggde”.

« Ma si, lassamu sti discorsi vani,

ormai è tardu, ‘u sule staci mpuna,

de retu allu palazzu d’i Villani

a ‘ncelu staci esse ormai la luna ».

“Mo me ricoiu ch’è passata l’ura,

no suntu chiui carusu de vint’anni,

ca basta piu nu picca de friscura

e me ritrovu chinu de malanni.

Vulia tant’otre cose cu te dicu...

Lu sai ca su rravatu a quistu puntu:

daretu aggdai a Sant’Anna ntra lu vicu

sto sulu ca no tegnu cu ci cuntu.

Nu riggdu sullu stanturu d’a porta

Me dane vuce e tene cumpagnia:

eppuru chira vuce me cunforta,

comu alli tiempi ca tania famia.  

De chiri cinque fii c’aggiu crisciuti

acquai nu n’è rimastu mancu unu

ca tutti o prima o poi se ne su sciuti,

ieu mai Presicce vosi cu bannunu;

pe iggdi u pane d’ucca me llavai

e mai m’aggiu piatu ieu nu sfiziu,

poi, chiru c’hannu fattu tie lu sai:

tentara cu me portene allu spiziu.

La sira, prima cu me chiudu a chiai,

ieu vardu ncelu a chira fanisceggda

sperannu Diu ca me llucisce crai;

me moggdu ntra lu sicchiu na fraseggda

na croce d’oiu mintu de vulia,

na menza sicaretta poi me dumu,

de ntra lu tiraturu la pastia

cu dormu ieu me piu, e me mmasunu;

cusi li giurni mei passu cuntentu,

e de stu picca tiempu ca rimane

fazzu de tuttu cu no me lamentu

de chiru ca la vita a mie me dane.

Ci terra ieu pe ciciri daventu

me vi’ passare stisu ventrisusu,

a quattru parsuni a mbrazze e l’otri a ronna

me dici: “statte bonu”, de la culonna

Ci poi me vi’ rravare all’otru munnu,

me raccumannu, cu me dai na manu,

nu boiu puru aggdai cu me scunfunnu,

cunta a San Pietru ch’è lu portulanu.

Me basta nu cantune de tre parmi

cu pozzu zzare l’occhi e cu te visciu

cusì com’aggiu fattu ntra quist’anni

ssattatu alla culonna de marisciu.

Famme cu ffruntu aggdai tutti i paisani,

presenteme tie a Cristu e alla Madonna,

e versu tutti porgine li mani,

t’imu vulutu bene... su gda culonna.

                FINE

       VITO STENDARDO