Poviri vagnunceddhi
A - Iti ntisu a dha silu? Le mesce mazziscene li vagnoni piccinneddhi!
B - Percé a chiempi nosci se mintivene li quanti?
C - Futtitivene, ci v'a criati, tantu munnu era e munnu è.
A - Sine nu dicu ca none, puru tannu vulavene li scarzuni. Me ricordu mama ca a la
mescia li dicia: ci se le mmerita dannele ca poi a casa li dò lu restu.
B - Jeu a la silu nu su sciutu ca mama me mmannava a dha la nunna Cuncetta, era
pizzisanta sine ma nu cu li mani logni. Però me ricordu lu primu giurnu de scola,
dopu quattru ure filate ssattatu quetu quetu su lu bancu nu nci la facia cchiui e nu
bidia l'ura cu essu a dha fore e quannu sta scavarcava lu limmatare me ssiu de intra
nu cridu de cuntantezzi e tuttuccotu me vitti rrivare, de la mescia De Lisanti, nu scaffu
a nfacce a manu china.
C - Menumale ca era De Lisanti, si nò a cavici t'ia pijatu. Pocca, prova moi cu ncarizzi nu
vagnone, rria fucennu lu sire e se la scunta, ci nu spicci a ncarcere.
A - Poviri vagnoni però, pozzu capire nu scafficeddhu de la mamma, ma le mazzate de le
mesce none, mò.
B - Ve la ricurdati la mescia Bisa? Dicia sempre: - te dò 50 sfrerzate! E de veru facia
aprire la manu a ci li ccappava a tiru e cu la rica dava corpu su corpu.
C - Futtitivene, ve sta ricurdati de le mazzate ca imu pijate de vagnoni e nu panzati a
chire ca ne tocchene crai pescrai ntra quarche ricovuru de vecchiareddhi quannu na
badante nu ne basta e pe doi nu ne bastene li sordi!
B - Cu la giusta ragione, pocca, iti ntisu quanti vecchiareddhi, ca nu tennu ciuveddhi
vennu ttaccati a lu lettu, pijati a male palore, mazzisciati, sputati a nfacce e
ddurmisciuti cu le medicine ca a fiate nu se ddiscitene mancu cchiui.
A - Menumale ca nc'è la manu de Diu ca li manna a l'infernu a sti discraziati ca ne
mbrufittene de sti sbenturati, nfessaluti senza ciuveddhi ca li varda e fazza Diu!
B - E nunn'era meju ci la manu Domineddiu la mintia prima? Ca quannu è crai, cci se ne
futtene issi ca sta fannu già terra pe ciciri.
C - Ci v'a criati, già stamu comu stamu e vui ve sta faciti sti cunti? Comu vene vene e be
criditi vui ca nfessalimu propiu? Jeu me crisciu ca nu spicciu a dhi condizioni!
A - Cci ne sai tie de quannu e de comu spicci? Stamu tutti ntra li mani de Diu!
B - A mie me pare ca meju de tuttu è ci ne sciamu citti citti e tuttu de paru, nu corpu a
nchinu e ci s'a vistu s'a vistu!
A - None mo e a li toi de intra nu penzi? Pareddhi mei, rrimannu fiacchi ci ne sciamu
tuttuccotu. E poi ci pe ci sa tanimu quarche paccatu? None mo, mancu unti cu l'Oju
Santu e senza la Crazia de Diu?
B - Meju no? Ne sciamu cchiu leggi leggi.
A - Nu canci mai, ma ci nu te cunfessi prima mmori, vai darittu a l'infernu e pesciu pe tie.
C - Cci se ne futte issu, tantu nu cride a nenzi!
B - A cquai ve sbajati tutti doi fessi mei! Jeu è veru ca nu crisciu a l'avutru munnu, ma
ci ... pe ... ci sa, lu Paradisu a ntra lu posciattinu lu tegnu, percé jeu aggiu fatti li
"sette primi vennardia de mese a lu Coredegesù" e m'ane prumisu ca nu pozzu
crapare ci nu sto a ngrazie de Diu.
A - Nu te lu mmeriti ma sarà ca è meju pe tie e fazza Diu!
Inviato da: cassetta2
il 29/05/2023 alle 18:33
Inviato da: Mr.Loto
il 21/08/2020 alle 17:39
Inviato da: sciroccu
il 22/04/2020 alle 13:10
Inviato da: cassetta2
il 22/04/2020 alle 11:06
Inviato da: cassetta2
il 20/11/2019 alle 16:11