PRESICCESI NEL MONDO

STUCCAMU LU ZIPPU

STUCCAMU LU ZIPPU

(da tre vecchiareddhi)

A - Stammane, nu te paria ura, cu beni?
C - E cci m'aggiu persu nenzi, ci v'a criati? A dhu ne tocca, osci?

A - A dhuveddhi, sulu ca lu cafè s'ane ndrafaddutu.

C - E nu nn'èrive pututu spettare cu me lu faciti fare?

B - Era pe issu ma stammane nu se l'ane vìpputu, pe lu core. Mo, te ne fazzu fare n'avutru cavutu cavutu.
A - Sinti sempre l'urtimu ca rrivi, fraccòmmitu!
C - Tie, nunn'ai vulutu lu café? Ci t'a criatu, cci tteni paura cunussia mori?

A - La cautela è sempre cautela, la morte pote rrivare de nu mumentu a l'avutru, puru pe tie sai? Chira rria quannu menu te lu cridi.

C - Famme cu me rattu, ci t'a criatu, ca cu tie nu se pote stare scuscitati!

B - Quannu ne tocca, ne tocca, è la legge de la natura!

A - Stamu ntra li mani de Diu! E' Iddhu ca ne chiama. Le scritture dicene ca pote essere puru crai pescrai e fazza Diu!

B - Su cchiui de cinquemila anni ca li Prufeti vosci, cu lu osci e cu lu crai, ve fannu stare su le spine, fessi!
A - E, pocca! Imu stare sempre allallerta, ca nu se sape lu giurnu.
B - Lu giurnu, lu mese, l'annu, lu seculu o lu millenniu? Ma nunn'era Gesucristu tou ca domila anni rretu predicava ca la fine de lu munnu era vicina e ttoccava cu ne facimu truvare pronti e a ngrazie de Diu? A le Vergineddhe nu li disse cu stannu ddiscitate e cu tennu la lampa sempre ddumata e cu se fannu la pruvista de l'oju, ca nu se sape l'ura de lu giurnu o de la notte, de la vanuta de lu Zitu?
A - Cci bò ne sacci tie? Teni ncora la ucca lurda de cafè e nzigni già cu te sciacqui le carze cu le cose de Diu e mò, fazza Diu!

B - Iti ntisu lu iussu novu de la Cassazione? Moi, unu pote spezzare lu zippu de nu ristianu quannu vole, ca nunn'è reatu!

A - La vita è lu bene cchiu ranne ca Domineddiu n'ane datu e g'è Iddhu e sulu Iddhu ca ne la pote llevare!
C - Istu è veru! Puru a mie nu me pare giustu mo ca nu giudice pote stutare le machine cu me face murire. Iddhu pote dire chiru ca è giustu e chiru ca nunn'è, cu le leggi fatte de li ristiani e nu cu chire fatte de Diu!
A - Puru issu la penza comu mie, scumanacatu! La vita ne l'ane data Diu a lode gloria de la Nnipotenza Sua e nunn'è l'ommu ca pote dire e fare cci bole, cu la vita de li ristiani.
B - Senti nu picca, pizzisantu! Ai ntisu mai cuntare de la bonamorte? Ci unu pe anni e anni, stane a nfunnu de lettu comu nu tàccuru, senza cu dice né ahi né bai, senza cu descia segnu ca sente e ca capisce, rrafiata cu la suca, lu core li sbatte chianu e cu lu jutu de la pila, me dici tie, cci campa a fare, unu cusì?
C - Puru istu è veru, pareddhu, nunn'è meju ci se ne va a ngrazie de Diu, ci v'a criati?

A - Ci Diu ane decisu ca unu ane campare ncora, percé mo l'imu ffare murire? Lu Signore sape chiru ca face, vide e pruvide e sulu Iddhu pia l'urtima decisione pe lu corpu e l'anima noscia e fazza Diu!

B - Ma jeu su patrunu cu dicu basta ci pe ci sa ddaventu n'ammassu de carne ca nu mmuscia, nu se mmove, nu penza, nu rrafiata, me dici tie cci rrimagnu viu a fare ca nu sservu a ciuveddhi mancu a Domineddiu, ci nu me fidu cu li dicu mancu nu patarnosciu?

A - Ci lu Nniputente ane decisu ca nu ristianu ane campare, campa. Lu corpu nu pote glorificare l'Eternu ma l'anima sine. E' propriu l'anima ca nu putimu ristaccare de dh'ammassu de carne, comu dici tie e fazza Diu!

C - Ma siti sicuri ca osci imu cuntare, sulu de morte, ci v'a criati ? Quannu rria rria, basta cu ne dane lu chiempu cu trasimu ntra la Crazia de Diu.
A - Ma issu nu bole cu capisce cci g'è la Crazia de Diu. Nu cride ca Diu è tuttu: Iddhu è vita, Iddhu è luce, Iddhu è capu, Iddhu è giudice e sulu Iddhu sape comu e quannu n'ane chiamare pe la vita eterna. Iddhu ne pote dare la bona o la fiacca morte. Sulu li ristiani ca nu tennu Fede, ponnu panzare cu se mmentene leggi cuntrarie a chire de Diu e fazza Diu. Ci simu nui, poviri peccatori, ca putimu sapire quannu spezzare lu zippu de nu ristianu? Nu bastene li tanti giudici, su sta terra, ca cu la scusa de la giustizia umana sacramentene la pena de morte? Nu te su bastati li sacrifizi de tanti martiri e tanti sciudei, sfissiati?
C - E' veru, pareddhi, tutti dhi poviri ristiani, ca poi, sciudei erene, cu cci dirittu su stati ccisi, nu me pare ca erene de razza fiacca!

B - Cuntati e cuntati e me crisciu ca la sta faciti de fore a lu rinale. Cci c'entrene mò tutte chire mijara de martiri de la pulitica o de la religgione? Sta cuntamu de chiri ca, volene cu morene a nsanta pace. Chiri ca suntu senza sparanza, chiri ca stannu cchiui de dhai cca de cquai. Chiri ca ci nci su o nu nci su nu cancia nenzi a stu munnu. Chiri ca volene cu se libberene de la dulore e de le tribulazioni de la carne. Cci te ne catti de unu ca stane stisu comu na mmummia? Chiru è già ntra lu sabburcu e nunn'è ca li faci nu favore cu lu teni viu, anzi!

A - Allora chiudimu l'ospedali a li vecchi, chiudimu li ricoviri, cusì sparagnamu puru. Giacca, li llevamu puru la penzione cusì nu se ponnu mmantanire mancu na badante, tantu prima morene e meju è! Oppuru nu li damu cchiui le medicine giuste oppuru li llevamu la scossa a le machine oppuru li ristaccamu tutte le suche ca li tennu vii.
C - Ci v'a criati, mo me vuliti llevare la badante? E comu campu sulu, ci me llava, ci me cucina e ci me ssiste?

B - Cittu, tie! Issu sta spaleggia de capu, pareddhu! Cci ccentrene mo sti discorsi? Sta cuntamu de chiri ca parene vii ma ca nu ssu vii. De chiri ca mancene e bbivene mmane e sira pastije, de chiri ttaccati a li fili e a le suche, ca stannu te ca te, cu se ne vannu, de chiri ca tennu, vui la chiamati anima, ma è sulu l'urtimu rrispiju a mmenzu li denti. Vo' cu ne la dai na bonamorte, a sti ristiani, ci rrivene a dhi condizioni? A mie me pare ca è n'opara bona ci nui li facimu ndrafascare e nu sulu iddhi ma ndrafischene puru tutti chiri ca li stannu ntornu notte e giurnu, pareddhi!

A - Jeu dicu ca ci stuta le machine a nu malatu è nu Cainu. Lu dottore nu ddaventa dottore cu ccide li ristiani ma cu li sana e cu li mmantene a nvita.
C - Pocca ci v'a criati! Lu dottore nu pote mai ccidire nu malatu, vagnone o vecchiu, ca è.

B - V'iti ncapuniti e cuntati de ccidire li ristiani. Ci è ca vole cu ccide li ristiani? Cuntati tuttidoi a schiòvere. Jeu sta be dicu ca nu ristianu ane d'essere patrunu cu eggia llassatu murire a nsanta pace, senza cu eggia martoriatu, quannu rria a dhi condizioni. Me diciti nu picca cci vita è, chira de unu ca stane cusì?

A - Pocca, è vita chira ca voi lli llevi tie, ssassinu ca nu si avutru e fazza Diu! Speriamu cu nu rrivi a dhi condizioni, fessa! Moi cunti cunti, ca penzi ca ttocca a l'avitri ma quannu ttocca a tie lu cuntu è n'avutru. Me pare comu quannu ca mo te visciu: stisu, menzu viu e menzu mortu, cu lu Rusariu nturtijatu a li mani, ca prechi Diu cu te mmantegna ncora viu su sta terra e me crisciu ca lu prei puru cu te sarva l'anima, speriamu, e fazza Diu!