PRESICCESI NEL MONDO

LA GNATA

LA GNATA

(soliti tre vecchietti, davanti al bar per prendere il caffè )

B – A nui ne tocca! Ci trase prima?

A – Trasi tie ca si lu cchiu ranne.

C – Pocca dice bonu issu, ci t'a criatu, tie lu cchiu ranne sinti!

B – Mo puru pe lu cafè me faciti pisare ca suntu lu cchiu vecchiu? Ca poi ci propiu vulimu cu la dicimu tutta, nci suntu si e no tre misi de scartu ntra mie e tie (rivolto ad A) e cu issu nu nne llevamu mancu n'annu.

A – Mmanìscete e trasi ca si no pardimu lu turnu.

C - Ah! Sta penzu ca stivene meju quannu stivene pesciu, ca tannu cu lu cafè, tutte le mmani era na cummertazione e mo, ci l'a criatu stu curuna, ne face pijare lu cafè tutti sparpajati. Prima lu “sportu” lu facivene li sciocatori de pallone e puru l'acquarise cu lu paleddhu, mo è ddavantatu lu cafè vìpputu a menzu a la via.

A - Istu aasportu è, cu la a de nanzi, pampasciune!

C - Cu la a de nanzi o de taretu, pe mie lu cafè vìpputu cusì nu me piace, nu tene nuddhu custu. Ao, trasi ttocca a tie ca issu è ssutu, nu lu vidi, tene lu bicchiareddhu de plastica a manu.

B - Menumale ca li barra stannu perti ca, ci nui erene ddavantati “russi”, mancu a cquaffore ne lu putivene pijare, lu cafè!

C - Sentu cuntare ca fannu la gnata a li vecchi. Ma a nui, ci l'a criati, quannu ne tocca?

B - Quassutta mo rria na! Nci vole chiempu, stamu mutu luntani, ci sape quannu ne tocca a nui.

A - (tra un sorso e l'altro) Jeu, nu sacciu mancu ci me la fazzu!

B - Percé mo? Timi pe lu carottu o cunussia te face dannu?

A - None, comu tignu pe lu carottu, ca su tuttu carotti carotti, ci sape quanti me n'annu fatti, tignu ca nu se sape bonu cci nc'è a intra a la buttijeddha e ci poi ccappamu nenzi? Chira medicina nova è. Stamu ntra li mani de Diu e, fazza Diu!

B - None, stamu ntra li mani de li dottori e ttocca cu li damu retta ca, pareddhi, la fannu pe lu bene nosciu.

C - (uscito, mentre beve il caffè) Pe lu bene nosciu o pe chiri ca l'annu mmentata, la gnata? Nu me lu lleva ciuveddhi de capu a mie, e nu su mancu lu sulu, ca s'annu mmentatu tuttu cu fannu sordi, ci l'a criati!

B – Ma ci te le minte a ncapu ste fesserie?

A - Pocca, cchiui de unu la penza cusine, ca l'annu fatta mposta cu fannu sordi e cu ne tennu chiusi boni boni ntra casa!

B – Ma stative citti! Nu be faciti ccanuscere! Ristiani mei! Scurnativene! Pozzu capire li scarufaterra ca nu su sciuti a la scola ma de vui, nu me la menzava filu ca cridivive a ste minchiate. E pocca! S'annu mmentatu tuttu, puru le filare de carri chini de chiavuti purtati a ngiru de nu campusantu a l'avutru cu trovene nu picchi de terra bona cu li prechene. Pocca! Tanti nfermieri e dottori su morti pe doja de vagnaru o pe doja de stommucu ca ivene fattu inchiamentu. An'Italia quasi novantamila ristiani, pareddhi, su morti,sacunnu vui percé? Percé se su mmalazzati durmennu cu lu culu de fore?

A - E mo nu basta? Sine, aggiu cuntatu ca nc'è ci cride a ste cose ma nunn'aggiu dittu ca nci crisciu, jeu.

B - Però hai dittu ca nu sai ci te la faci la gnata. Ca nu cridi ca te face bonu e ca se l'annu mmentata cu fannu sordi.

C - Percé, te cridi tie ca le gnate ne le dannu franche? Ci sape quanti sordi ne sculene, ci l'a criati!

B - Certu ca li sordi se li fannu, nenzi pe nenzi nu face nenzi ciuveddhi, ma la pursione cchiu rossa se ne vane pe lu studiu e pe le machine.
A - Ma puru ca me menzu, ca la nezione face bonu, su patrunu jeu, cu dicu ci voju o nu boju cu me la fazzu la gnata, e fazza Diu?

B - A ccomu me crisciu jeu, NO! Sacunnu mie ttocca cu ne la facimu tutti ca si no, lu curuna vane a ngiru ci sape pe quanti anni ncora, pote zziccare li vagnoni e, ci cancia facce, se zzicca puru a le vestie e inche tuttu lu munnu e li ristiani e le vestie ponnu scumparire de la facce de la terra.

A - Pocca! Mo ne rria la Pocalisse! Domineddiu sape cci ane fare. Iddhu, sulu Iddhu sape quannu ane scancellare stu curuna e quannu ane spicciare lu munnu! A Iddhu n'imu rraccumannare l'anima, facennu penitenze e dicennu Rusari e Giaculatorie e fazza Diu!

B - A Iddhu ne putimu raccumannare l'anima, certu, ma a lu corpu ttocca cu panzamu suli, cu le pastije e cu la gnata, percé ci lu corpu more, l'anima se ne vola e ci la zzicca cchiui! 

NOTA: Ieri ho ricevuto la seconda dose del vaccino - tutto OK. (S.S. Lazio)