« M'AGGIU SUNNATU | MEA CULPA » |
Post n°111 pubblicato il 25 Agosto 2018 da ginoscirocco
Continuazione Ai capitu li ristiani de moi, s'annu mparati cu volene a ncelu comu mie! L'aggiu llassati ca durmivene a ntra le rutte e manciavene terracate e mò varda bidi cci t'annu nventatu. Beddhi mei ci sape, tutticcoti, comu se volene bene ntra de iddhi! Varda varda spiccia l'acqua e nzigna lu voscu. Comu s'annu fatte tise ste chiante. Se spiccia lu voscu e sutta a mie visciu tante turri darlampanti ca su fatte de litru. Lampu cu li zzicca! Pe picca nu me cecu n'occhiu cu ista ca è cchiu tisa de l'avetre. Nci l'annu fatta cu rrivene fenca a ncelu, ca a Babele se mbrujara le lignue e persara lu fattu pe lu ffare. Varda quante casciteddhe de fierru curuddhelene su le rote! A dhu fusciti? Nu lampu v'aggiu dittu cu faciti fiji ma me pare ca nn'iti mbrufittatu mutu. Sarà ca siti ddavantati de cchiui de le vestie e mo cci manciati fessi, foje reste? A chiempi de tannu me rrivava armenu lu ndoru de quarche scencu o aviniceddhu rrustutu! E moi nenzi, sentu sulu fezzu e l'aria me zzicca a li cannavozzi, sarà ca è lu fumu ca esse de dhe turri janche e russe. Era meju lu ndoru de carne! Sta bisciu ca m'annu fatte nu saccu de chesie ma nu se ssamijene ntra de iddhe e le chiamene puru cu numi scanci. Varda ista tene sei pati, li pariti de petra rricamata e a ogni patu nc'è nu mbracchiu ca scinne de tutte le vanne. St'avatra tene le liame de chianche russe ca parene onne de lu mare. Ista tene nu coppullinu beddhu ranne cu susu do stozzi de fierru ncruciati e st'avatra de coppullini ne tene tanti cu susu na feddha de luna e tante turriceddhe tornu tornu. Ista è ranne de veru, tutta archi archi cu na chiazza beddha ranne e cu a menzu nu catafarcu nivuru. St'avatra de coppullini ne tene unu sulu ma è de oru. Scinnu cu sentu nu picca cci dicene de mie. Ehi? me ricordene ncora, sulu ca me dannu tanti numi scanci! Nu vecchiareddhu m'ane chiamatu ZEUS, nu ristianu ATON, unu YAHWEH, n'avutru BUDDHA, n'avutru ncora DIU e m'ane dimannatu comu stane Fijama, poi n'avutru ZARATUSTRA e ZOROASTRU e n'avutru ncora ALLAH e poi GEOVA, WOTAN, CUNFUCIU, TAU, ODINU, na vagnona cu li capiddhi d'oru m'ane chiamatu THOR e na ristiana GINU, ma ista è mujerama, canuscu la uce. |
https://blog.libero.it/PRESICCEBLOG/trackback.php?msg=13739622
I blog che hanno inviato un Trackback a questo messaggio:
AREA PERSONALE
TAG
CERCA IN QUESTO BLOG
MENU
ULTIMI COMMENTI
Inviato da: cassetta2
il 29/05/2023 alle 18:33
Inviato da: Mr.Loto
il 21/08/2020 alle 17:39
Inviato da: sciroccu
il 22/04/2020 alle 13:10
Inviato da: cassetta2
il 22/04/2020 alle 11:06
Inviato da: cassetta2
il 20/11/2019 alle 16:11