PRESICCESI NEL MONDO

ABRANU NNUCE LA PACE ?

(da "A cummertazione")

ABRAMU NNUCE LA PACE?

Li Ebrei d'Israele e l'arabi de la Palestina sta se llitechene attorna de bruttu. Nunn'è ca nc'è statu mai nu chiempu ca s'annu vuluti bene ntra de iddhi percé su stati sempre comu cani e catti.
Me crisciu ca sta se ccidene pe lu jussu ca vantene tuttidoi su dhu stozzu de terra ca, comu se cunta, Diu “prumise” a l'Abramu e a li fiji de li fiji soi, ca de issu pijara lu nume de Ebrei. Nu l'isse mai fattu! De tannu, l'Ebrei e dha terra nunn'annu mai utu bene. Prima li Babilunesi, poi l'Egizi, poi li Macedoni, poi li Rumani, poi li Ottumani e poi tutte le strappine de ristiani ca stannu de costi, de nanzi, de taretu, de suttta e de susu. Suntu tutti capitosti percé tennu ncora le sanse de li ntichi ca dicivene “nu me ne futtu ca li buscu, basta ca me mazzisciu”. E' veru ca tutti volene cu cumannene su dha terra ma a mie ciuveddhi me llea de capu ca nfunnu nfunnu suntu llutte "sante" pe la grannezza de le Chesie, de le Muschee e de le Sinacoche.
Me crisciu ca tuttu ccumanzò a li chiempi de Abramu quannu, nu se sape percé, Diu se scucchiò l'Ebrei comu fiji scerti, ntra tutti l'avitri fiji e ntra tutte l'avetre razze e ddavantò lu Diu de Abramu. Mo dicu jeu, ci Domineddiu è giustu moi, era giustu puru tannu, e comu ane pututu fare: a ci fiji e a ci fijasci? Ma llassamu stare la Nniputenza.
Diu, prima, llassò tutta la terra criata a l'Adamu e a li fiji e a li naputi, pe fili e filori, ca se sparpajara pe ogni banna e pe quistu ttuccava cu eggia lu Diu de tutti e nvece, ddavantò lu Diu de Abramu.
Lu “Vecchiu Lascitu” cunta ca l'Abramu, natiu de Ur, s'ia ccucchiatu cu la beddha soru, de la menza de sire, nu de mamma, de nume Sara. Tutti doi de paru, cusijati nottechiempu de Diu, ca li dava la “Terra Prumisa” e tanti tanti fiji e naputi, bannunara casa e parenti e se ne scira a Canaan. Ma, comu è e comu nunn'è, li fij nu banivene e la Terra tantu Prumisa, era sicca ca nu chiuvia e le vestie murivene de fame e de site. Cusì l' Abramu e la Sara ttuccò cu bannunene ttorna tuttu e cu se ne vannu fucennu fucennu in Egittu. A quai se sparse lu vuce su li baddhizzi de la Sara e lu faraone vose cu la viscia. Abramu la ccumpagnò a lu palazzu ma, pe paura cunussia lu faraone lu facia ccidire percé, sulu ci era signurina o cattìa, se la putia pijare, se pprasantò comu frate, nu comu maritu. Ma lu diavulu è diavulu e nussacciu comu, lu faraone se ne ncorse e ne li cacciò de lu palazzu.
Quannu, dopu tantu chiempu, vittara ca nzignava a chiuvire attorna, se pijara la schiava Agar e pede nnanzi pede se ne turnara a Canaan.
Passara l'anni e la Sara, ddavantata ranniceddha, ìa perse le sparanze de nu fiju e cusì dese denzia a lu maritu cu se ccucchia cu la schiava giziana Agar e, mprima mprima nasciu nu fiju e lu chiamara Ismaele. A picchi picchi, la matrigna Sara pijò a core lu vagnone e se lu ntise comu sou fenca a quannu, pe miraculu, nu rrimase prena puru iddha dopu ca, cu lu maritu, ivene datu de manciare e de durmire a certi furastieri ca erene passati pe scasulità, vicinu a casa loru. Lu fiju nasciu beddhu scinciru e lu chiamara Isaccu. Quannu se fice ranniceddhu, la Sara, pe paura cunussia la rrobba scia a lu primugenitu Ismaele, tantu fice e tantu rumpiu l'anima, ca mise lu maritu cu le spaddhe a lu parite e, dittu e fattu, l'Abramu ne cacciò de casa la schiava cu lu fiju e cusì, pareddhi, se ficiara a la mpede, de pizzu a pizzu, tuttu lu desertu arabu cu nu saccu de pane ntustilisciatu e nu cojuru siccatu de crapa chinu de acqua. Menumale ca Diu vide e pruvide e cusì, mentre mamma e fiju stavene te ca te, cu se ne vannu all'avutru munnu pe la site, Domineddiu li fice cumparire a nnanzi a li pedi, nu puzzu chinu de acqua beddha frisca, ca rrisuscitava li morti.
Stu bruttu fattu de malanimu de Sara e de Abramu è ccappatu, annu cchiui annu menu, cchiui de quattru mijara d'anni rretu e l'Arabi nu se l'annu mai scurdata sta malefatta e mancu Diu. Nfatti, do' mijara d'anni dopu, Diu fice nascìre da n'ebrea e su la “Terra Prumisa”, nu vagnunceddhu, ca cu le parabele scuncassò le sanze de tutte le razze de Abramu prima e de tutta la terra poi, criannu, de capu a li pedi, nu “Novu Lascitu”. Poi, nu cuttentu ncora, dopu mancu 650 anni, Diu sciu a nsonnu a nu prufeta arabu de nume Maumettu e, ricurdannuli ca scinnia de la razza de Abramu pe via de lu fiju Ismaele, li dese, cu lu jutu de l'Anciulu Carbieli, n'avutru “Lascitu” ca pijò nume “Corano”.
Moi a Gerusalemme, la cchiu ranne città de la “Terra Prumisa”, nci stannu ristiani de tutti e tre li “Lasciti” e mentre unu de quisti tene casa sua, l'avitri doi vivene de paru ma facennuse dispietti ntra de iddhi: minannu bomme, scarrannu case e sfracellannu ristiani. Stamu speranziati, mo' tutti, ca l'Abramu cunta attorna cu lu Patreternu e se raccumanna cu nnuce La PACE, senza dalluji e caristie, su sta “Terra Prumisa” e ncorda, cusì pe' sempre, le do' strappine e le do' chesie, mintennu fine, dopu cchiui de 4000 anni, a li cuntrasti pulitici e religgiosi de li nnantisciuti.