Di tutto

La Balilla

Vorii savè el mestee che foo mi?
Cominci ai des or, finissi a mezdì,
giri la Baia col motofurgon,
vendi lisciva, soda e savon.

Mi voo in gir de chi e de là,
mi voo in gir per lavorà,
hoo fa ona pigna de cart de mila,
m’è vegnuu in ment de compraà ona Balilla.

L’è stada la rabbia di mè fradej
che hann cominciaa a sgagnamm i budej;
la mia cusina che la stà in Via Larga
la s’è mangiada anca la targa.

La mia zia de Gorgonzoeula
cont i gomm l’ha faa la cazzoeula;
el me nonno che’l gh’ha l’angina
l’ha ciappaa la ciocca cont la benzina.

El Franchino, el pussee fedel,
el m’ha portaa via tutt i candell;
el “Carnera” che tira de dester
cont on boff el me s’ceppa i balester.

La Maria che stà in la mia porta
la m’ha mangiaa la roeuda de scorta;
el cines cicis ce spofen

el m’ha mangiaa in d’on boccon tutt el cofen.

El marescial di carabinier
cont i bocca i quatter porter;
je sgagnava senza rispett:
insema ai porter l’ha mangiaa anca i manett.

El Carletto stupidott
el se faa on vestii cont la capot;
i me nevod pussee piscinitt
salta in vettura a mangiamm anca i vitt.

A gh’è vun che vegn de Bagg,
el ciappa i roeud e’l me mangia anca i ragg;
lì in d’on porton gh’è el Salvador
cont in bocca el radiator.

Passa on fioeu senza dentin,
el me disvida i lampadin;
el me fradel, quel malaa de diabete,
el fa finta de nient, el me mangia el magnete.

El mè portinar ch’el porta i occiaj
salta su a mangiam i fanaj;
voo in questura a denuncià i dann,
quand torni indree gh’è pu gnanca i pedann.

A voo per caso a trovà mia sorella,
ghe troeuvi in caa on piston e ona biella;
quand torni indree gh’è restaa solament
el fumm del tubo de scappament.

Mi voo in gir de chi e de là,
mi voo in gir per lavorà,
hoo faa ona pigna de cart de mila,
ma compri pu on’altra Balilla!

mi sun de milan ma vuraria vedè el mar ogni tant.......