Il Parnaso

SIRA DE SCENNARU

Lu celu è tuttu quantu nfumulatu
e nùle comu veli trasparenti,
purtate de la fiura de li jenti
tuttu de jancu l'hanu mbughecatu.

'Mienzu nu cèrchiu bedhu culuratu
rite la luna nòa, 'nturnu nu' sienti
na uce, nu cantu, a la campagna: nienti,
sia ca tuttu lu mundu stae 'mpannatu.

E 'ntru li campi citti 'ddurmesciuti
stae quarche luce 'nturnu sparpaghiata,
e longa ritta janca stae la strata

chiusa d'arveri sicchi spaleruti,
a 'du li jenti sciòcanu scherzandu,
a 'du li jenti s'àmanu sciucandu.

                                               DON KABER

da: Letteratura dialettale salentina.Dall'Otto al Novecento,
a cura di Donato Valli,Congedo,Galatina,1995