PRESICCESI NEL MONDO

LA CUCCUVASCIA (tratto da"Acummertazione cu lu Ginu")

Se cunta ca na fiata lu patrunu Nzinu de Prisicce sciu cu se dduna a na cisura sua de pedi de vulie cu quarche pede de fica ca tania a ntra lu feu de le Chiuse. Se vvicinò a la fica de Saggiuvanni cu bide ci pe casu nc'era quarche culummara fatta quannu ntise na cuccuvascia cantare. Lu patrunu Cosimeddhu, ca pe' scasulità se truvava puru iddhu sutta a la fica ma intra a la cisura sua, ca ncorparavene, li dese vuce:
- ai ntisu cumpare Nzinu comu m'ane cantatu la cuccuvascia?
- ma! cci si fessa, cumpare Cosimeddhu ? Nunn'ai ntisu ca la cuccuvascia canta pe' mie percene su lu pede de fica meu, stane!
- varda cumpare ca puru ca la cuccuvascia stane su lu pede de fica tou, canta mpuggiata su nu rammunu ca penne a ntra mie.
- vidi nu picca ci usi lu sale ca teni a ncapu e fatte capace ca la raggione stane de la menza mia!
-jeu lu sale lu tegnu e cu ne vinnu ma sta fiata, cumpare meu, te sta sbaji de rossu e ttocca cu te capaciti ca lu tortu è tou. 
Crida de cquai e crida de ddhai, nzignara cu se mannene a fafottere cu malepalore e castignete e nu la spicciavene cchiui tantu ca sta mpunia lu sule e iddhi stivene sempre a dhai scuddhannu Santi e Madonne, sprecannu li morti nnantisciuti e mintennu a rriscu puru lu cumparaggiu cu tuttu Saggiuvanni.
A na ccert'ura  se scucchiara cu la mira ca sulu l'avvucatu li putia dare raggione senza cu rrivene a le mazzate.
E foe cusì ca scira uniti a dha donn'Andrea l'avvucatu cu cerchene cusiju. 
Mancu erene trasuti a lu studiu ca nzignara ttorna cu se pijene a malepalore puru a nnanzi a l'avvucatu ca, stizzatu, cridò:
- stative nu picca citti e nu cridati cu nu su surdu! Cci dgé ca vuliti de mie? Cuntati unu a la fiata e nzigna lu Nzinu ca me pare ca è cchiu rranne. 
- ai ssapire ssignuria - nzignò cunta lu Nzinu - ca jeu tegnu na cisura de vulie cu quarche pede de fica a susu le Chiuse e a dhai su sciutu cu me ddunu stavespara cu bisciu puru ci nc'era quarche culummara fatta e cusì me sta vvicinava a lu pede de fica de Saggiuvanni, quannu tuttuccotu aggiu ntisa cantare na cuccuvascia ca stia propiu su lu pede de fica meu. Nu boi tie ca lu cquai ppresente cumpare Cosimeddhu nu se nn'esse cu dice ca la cuccuvascia ia cantatu pe' iddhu percene stia mpuggiata su na cona de la fica mia ca spurgia a ntra la cisura sua!
- cci dici, Cosimeddhu, mo' poti cuntare puru tie -li disse donn'Andrea.
- dicu ca sine - rispuse lu Cosimeddhu - tuttu comu ane cuntatu iddhu, sulu ca la cuccuvascia, stannu de la menza mia, è giustu ca ane cantatu pe' mie.
L'avvucatu li licinziò cu la prumisa ca li facia ssapire poi ci tania la raggione e disse:
- pe' moi ttocca cu me dati 100 lire padunu, tantu pe' nzignare, pe' lu fastidiu.
- chiru ca è giustu è giustu - disse lu Nzinu cu la manu ntra la mariola.
- pocca! -secutò lu Cosimeddhu- chiru ca è, è e nu badamu a spese!
Cu nu la portu a la logna ve dicu ca passara quasi tre anni de scire e banire e l'avvucatu cu na scusa e cu n'avatra purtava nnanzi la cavasa e pijava sordi de tutti doi, quannu capiu ca la corda se putia rumpire, se li chiamò a lu studiu e li disse:
- visti li sordi ca m'iti dati, me pare ca la cuccuvascia ane cantatu pe' MIE!
Iddhi, tutti doi de paru, li rispusara:
- nunne face nenzi ca la cuccuvascia ane cantatu pe' signuria, basta ca nunn'ane cantatu pe' IDDHU!