PRESICCESI NEL MONDO

LETTERA

Cari paisani de intra e de fore,

l'urtima fiata ca v'aggiu scrittu è statu cu be dicu ca era mortu lu paisanu e amicu nosciu lu Cici Casciaru. De tannu è passatu cchiui de n'annu e ciuveddhi s'ane fattu viu ma visciu ca lu numuru de li ristiani ca videne stu "situ" vane nnanzi lustessu puru ca è cchiu chianu chianu.
Cchiui de na fiata m'aggiu misu cu scriu ma poi sulu stessu me dicu ca sarà ca a li ristiani nu li piace cu sente le minchiate mei! E cci ne sacciu? Ci mmenu quarchedunu se facia viu!
Ve fazzu ssapire c'aggiu spicciatu lu "Diziunariu Prisiccese" nou cu 2800 palore de chire ca mmuntuvavene li nnantisciuti nosci. N'aggiu stampate e cusute 14 copie pe l'amici e li parenti de intra ma, a cci lu vole, ne lu mannu cunzatu pe' la stampante o ranne a menza paggina A4 o piccinnu a nu quartu de paggina A4. Ci poi quarchedunu lu vole sulu pe lu PC lu tegnu prontu in Word, in Excel (di facile consultazione) o in pdf.
La fiata ci vene ve scriu n'avutru cuntu de "A cummertazione cu lu Ginu"

Pe' moi ve llassu, ve mannu tanti saluti e ve fazzu l'auguri de Bona Pasca.
Gino Rizzo (ginorizzo@alice.it).