PRESICCESI NEL MONDO

DON TUNINU

STROLACAMENTI

B - Llassumulu a mie, vane a dhunca ai scire, signuria, ca a issu nci penzu jeu, dici ca nu me fidu cu lu mmersu suttasusu cu tutta la carruzzeddha? (dà uno scossone alla carrozzina a rotelle sulla quale è seduto C)
C - Ci t'a criatu a tie e tutta la razza, voi cu me llassi stare, ne mbrufitti ca nu te pozzu mazzisciare ma quannu me azzu tisu me le scuntu tutte.
A - Ncora stai cu la musarda de la serba?
C - Ma cci dici mmenu.
A - T'aggiu vistu comu te la mmirci cu l'occhi de trija, scustumatu.
B - Te canuscu piru parazzu a tie, deveru ttuccava cu te ne scorni, vecchiu mprasciunatu.
 A - Canciamu cuntu, iti mtisu ca vene lu Papa?
B - Mo te ccala na! Cu tuttu chiru ca tene de fare cu ncorda li cardinali fraccommiti, mo vene cu troa tie!
C - Ca pe issu vene, none vene cu trova fijasa ca vole cu lu face Vescu!
A - Quannu la spicciati cu me pijati pe fessa tuttidoi è sempre tardu. Ma lu Papa vene lu stessu e fazza Diu!
B - Ma nunn'è ca vene a Prisicce, a dhu li tocca?
A - Vane a Dalassanu cu prea su lu Sabburcu de don Tuninu Bellu, ca mo face l'anni.
C - E tie vai?
B - Pocca, lu porta lu fiju prevete a ncavaddhizzi, cusì cu la scusa de la benedizione li face na llavata de capu a tuttidoi.
A - A tie nu bole mancu cu te viscia de luntanu, manciapreviti ca nu sinti avutru.
B - Vui iti canusciutu don Tuninu moi vescu  ma jeu me lu ricordu de vagnone quannu era prevateddhu a Uscentu e simu stati uniti pe quarche giurnu pe "l'esercizi spirituali" cu avitri carusi de li dintorni. Era ntra Natale e Capudannu de lu cinquantaquattru.
C - E tie cci facivi a dha lu Vescu li nzurtavi la mazza?
A - None dice deveru ca tannu era nu bonu vagnone issu, poi criscennu s'ane vastatu e fazza Diu!
B - Tannu la tania la Fede e stia sempre a mmenzu a li previti.
C - Ci t'a criatu e poi cci ai utu? T'ane pijatu nu tronu o t'ane mazzisciatu mujerata cu lu mminaturu? 
B - Cittu tie! Me ricordu ca don Tuninu era nu brau vagnone, era sozzu meu o picchi e nenzi cchiu ranne de mie. Le spieche cu le prediche ne le facia lu Vicariu e iddhu stia sempre scherzusu cu nui. Na vespara, ntra  lu salone de le cummertazioni, se mise cu tafanaddhiscia cu li pumi de na cascia ca paria l'aradiu ma denanzi tania nu cuperchiu de litru ccupputu. Pe nu picchi nu se vitte nenzi poi nzignò a nivacare e dopu picca chiempu se vitte nu circhiu cu tante linie de susu e de sutta. Tannu iddhu se girò e ne disse: ista la televisione è e serve cu vidimu le cose e li ristiani ca stannu a pizzu de lu munnu.
A - Macaru era! Se vide ca già de tannu lu lluminava lu Spiritu Santu e fazza Diu!
C - Cci ccentra mo lu Spiritu Santu cu la televisione?
B - Menumale ca ne la dici puru tie ca è nfessalutu cu le cose de Diu. Però Don Tuninu se vidia già ca era bonu de core ma ca ddavantava Vescu ci se la menzava!
A - Vescu è nenzi, Santu l'annu ffare!
C - Me pare ca sta fuci mutu, ci t'a criatu, e quali maraculi ane fattu?
B - Nunn'è ca nci vole mutu cu se ne nventene quarchedunu.
A - Pe moi basta ca vene lu Papa ca poi rrivene puru li miraculi e fazza Diu!