Creato da lgcasc il 06/09/2013

PRESICCESI NEL MONDO

Spazio d'incontro dei presiccesi

 

« LE BEDDHE FIJE DE LI RISTIANILECHE E CRUCIATE »

LU SETTEDEDENARI

Post n°123 pubblicato il 12 Maggio 2019 da ginoscirocco

 

da "a cummertazione cu lu Ginu"

LU SETTEDEDENARI

 

Na fiata, tanti, ma tanti anni rretu, nc'era a Prisicce n'ommu ca de nume facia Ndrea Cavaddhu. Era nu bonu ristianu ma nu ssapia fare nenzi e nenzi facia. Girava mmutateddhu pe lu paese e g'era cumpagnone de tutti li sozzi soi. Tania na sanza però, tutti li lunidia pijava lu trenu, la mmane mprima, e scia a Lecce. Nu caruseddhu, vicinu de casa, ca de nume facia Ntunucciu, na duminaca a la mmane, se fice curaggiu e, a nu mumentu ca lu Ndrea stia sulu, lu ffruntò:

- Bongiornu! Signuria me lu facivi nu faòre? - li dimannò.
- Dimme – li rispuse lu Ndrea – ci pozzu, cu tuttu lu core.
- Na fiata me porti a Lecce cu signuria, ca sulu nu me fidu? – li disse.
- Istu è tuttu? - rispuse lu Ndrea – puru crammane, ci voi, ca è lunidia, basta ca te azzi mprima e te faci truvare a la stazione pe le quattruquartu, ca a le quattru mmenza lu trenu parte.
- Santu benadittu sinti, ssignuria – rispuse lu Ntunucciu – ne vidimu crammane e bona sorta cu aggi, signuria e chiri de casa tua!
Tannu erene mutu picchi li ristiani ca se scaffavene fenca a Lecce, però lu lunidia, ca a Lecce era sciurnata de marcatu, nc'era cchiui de unu ca pijava lu trenu cu ba ccatta chiru ca nu truvava a lu paese. Minti puru ca lu lunidia tutti li frantujani scivene a Lecce cu smercene l'oju a li ccattaturi ca vanivene de dhe vanne.
Lu Ndreucciu, pe li presciarizzi, dha notte, nu pijò sonnu, e chianu chianu se ndrizzò versu la stazione ca ncora stia chiusa, ca nunn'era rrivatu mancu lu Luviggi Piccinneddhu.
Rrivò lu trenu ntra na nuvala de fumu e lu Ntunucciu secutò culu a culu lu Ndrea cu lu bijettu a manu fenca a nu se ssettara.
- Mintitulu a mposcia lu bijettu ca poi quannu rria lu cuntrullore ne lu dai cu te lu carotta – li disse lu Ndrea.
Lu Ntunucciu cusì fice e, cu l'occhi scantaraddhati, vardava de lu finestrinu e se custava, mo li pariteddhi, mo li peschi, mo quarche macchia, ca fuscennu cumparivene e scumparivene.
- Sta rrivamu? Sentu ca lu trenu fuce chianu – ddimannò lu Ntunucciu.
- Ma cci dici, mmenu, nci vole mutu ncora! Fuce chianu ca stamu a la nchianata de Tuje e puru lu trenu la sente – li rispuse lu Ndrea.
Rrivati a Lecce, scisara de lu trenu e se ndrizzara, a passu svertu, cu bannu a dha vanna a la chiazza de Santu Ronzu. Lu Ntunucciu vardava de cquai e de ddhai e panzava com'erene fessi li Liccisi ca ivene chiantate file logne de pedi ca nu davene vulie, né fiche, né pire. nenzi. Rrivati a lu marcatu cupertu, ca tannu stia de costi a lu casteddhu, lu Ndrea Cavaddhu se vutò rretu e, stannu facciffrunte cu lu Ntunucciu, li disse:
- Istu è lu marcatu cupertu, nui ne truvamu a cquai, a dhunca stamu moi, dopu menzidia, cusì ne ccattamu do cuddhure, mintimu intra do' sarde o do' scapici e manciamu. Vane a dhunca voi e ci pe ci sa te perdi, dimanna de mie ca cquai me canuscene comu lu “settededenari”.
- Giacca ca stamu cquai – dimannò lu Ntunucciu – me ne scornu cu te lu dimannu, de veru ca cquai nci sta na casa a dunca le fimmine … .
- Veni, te ccumpagnu sutta a Santu Lazzuru, te mmosciu lu purtune a dhunca ai trasire e poi, quannu ai spicciatu, te ne torni cquai. Ci te perdi, te lu dicu ttorna, dimanni de mie ca me canuscene comu lu “settededenari”.
"l'asu de mazze perde, l'asu de coppe perde, lu settededenari vince, unu, doi e tre: mintiti li sordi a dhu vuliti, ca ci mmistiti ve do lu doppiu de la posta. L'asu de mazze perde, l'asu de coppe perde, lu settededenari vince, unu, doi e tre: mintiti li sordi a dhu vuliti, ca ci mmistiti ve do lu doppiu de la posta”. Ista era l'arte scanusciuta de lu Ndrea Cavaddhu ca tutti li lunidia scia a Lecce e se buscava la samana a cojuru de li poviri fessi. 

Turnamu a lu Ntunucciu ca, pe la prima fiata, ia fattu chiru ca ia fare, se ne turnò a lu marcatu cupertu squariannu chiempu cu barda le bancareddhe ca se nfilavene logne logne, ntra lu palazzu de le Poste e lu casteddhu. Vinnivene lu bene de Diu! Ma lu Ntunucciu nu tania sordi cu ccatta e, quannu se menzò ca era menzidia, se mprossimò a lu postu. Lu Ndrea Cavaddhu nu nc'era ncora e lu Ntunucciu panzò ca era meju ci ccattava le do' cuddhure, senza sarde né scapici, ca nu ssapia li custi de lu Ndrea e se le mise a mposcia, una de na menza e una de l'avatra. Cusì se ssettò su nu scalune e ntise ca stia propiu de costi a na beddha buatta ranne china de sarde. Tania sempre d'occhiu lu palu de la luce a dhunca s'ivene truvare e cu la manu nzignò cu scugna la cuddhura a manu daritta. Lu chiempu nu passava mai e quannu nfilò attorna la manu a mposcia cu spezza n'avutru stozzu de pane, se ncorse ca, cu lu ndoru de le sarde, la cuddhura, stozzu stozzu, se l'ia gnuttuta tutta. Se ncorse puru ca s'ia fattu tardu e se mise de costi a lu palu e dimannava a tutti chiri ca passavene:
- nunnu nunnu ai vistu lu Ndrea Cavaddhu?

- no – rispunnivene,

- focu meu osci – se llamantava, lu Ntunucciu.
E dimanna dimanna, pareddhu, nu ssapia cc'ia fare. Ma varda bidi, panzava, cci cazzunculu m'ane tiratu dhu fessa! Me dice ca lu canuscene come lu “settededenari” e nu lu canusce ciuveddhi! Focu meu, osci! Comu fazzu de sulu a quammenzu! Tuttudeparu se sente na manu su la spaddha e g'era lu Ndrea Cavaddhu ca li dimannava ci lu tania fame.
- Cu te vegna lu bene a signuria! Si rrivatu? M'ivi dittu ca te canuscivene comu lu “settededenari” e cquai nu te canusce ciuveddhi!- li disse nu picca stizzatu lu Ntunucciu.

- Ma tie comu dimannavi?- li fice lu Ndrea.

- Ci canuscivene lu Ndrea Cavaddhu e me dicivene ca none – rispuse.
- Ma jeu te l'ia ditta ca cquai a mie, me canuscene comu “ lu Ndrea settededenari”, fessa!

 

 

 
 
 
Vai alla Home Page del blog

AREA PERSONALE

 

TAG

 

ARCHIVIO MESSAGGI

 
 << Marzo 2024 >> 
 
LuMaMeGiVeSaDo
 
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
 
 

CERCA IN QUESTO BLOG

  Trova
 

FACEBOOK

 
 

ULTIME VISITE AL BLOG

prefazione09ginosciroccoaida631m12ps12annamatrigianopoeta_semplicedony686cassetta2gryllo73ibanez92gMiele.Speziato0marabertowclock1991lucylla_sd
 

ULTIMI COMMENTI

CHI PUŅ SCRIVERE SUL BLOG

Tutti gli utenti registrati possono pubblicare messaggi in questo Blog e tutti possono pubblicare commenti.
 
RSS (Really simple syndication) Feed Atom
 
 
 
 

© Italiaonline S.p.A. 2024Direzione e coordinamento di Libero Acquisition S.á r.l.P. IVA 03970540963