PRESICCESI NEL MONDO

LU PILU E LU NZARTU

Da "Strolacamenti de tre vecchiareddhi"

LU PILU E LU NZARTU

A - A cquai v'iti ssattati? Ve cercava a lu barra.
B - Pocca! Stammane a cquai a la villetta se rispiscia nu picca.
A - Mo ca se azza lu sule, ve ne ncurgiti, fessi! E mo fazza Diu!
C - E nui ne zamu e ne sciamu cchiu nnanzi, ci v'a criati!
A - Me ccummu puru jeu, llora? de cci sta cuntàvive?
B - De nenzi. A no, si, li sta ddimannava comu è ca fijasa lu masculu st'annu nu s'ane fattu bidire pe nenzi.
A - Pocca nu l'aggiu vistu filu, nunn'è banutu, ncora?
C - St'annu nu bennu ca a mujerasa l'ì banuta la ula cu fannu la cruciera a mare e fijama l'ane ccuttantata.
A - E nunn'erene pututu fare la cruciera e poi vanire puru cquai?
C - Fenca è stata via mujerama, bunattanima, vanivene pe li Morti, a Natale, a Pasca e nu se pardivene mai nu state. La nora mia, era cuttenta comu na Pasca e me lu crisciu, nu facia nenzi de la mmane a la sira, ca tania mujerama ca li facia de serva a iddha e poi puru a lu vagnone. Mo, ca li ttocca cu se sciunce, la fessa, ci vene nu state nu bene a ll'avutru.
B - Su tutte pare, chire de dhe vanne. E la curpa è noscia ca nfessalimu pe le fimmene, dicivene bonu li ntichi: tira cchiui lu pilu cca lu nzartu!
A - Palore sante benaditte! E fazza Diu!
C - Cchiui de tuttu rrimagnu fiaccu, ca nu pozzu vidire lu vagnune, beddhu meu! Puru ca mo me lu mmoscene cu vozzappa, me manchene li sartarizzi soi.
A - Cu stu cavutu ci è ca va cu zzappa?
B - Cittu, cci bo ne ssacci tie de vozzappa ca si nticaru! Nu boi cu te ggiorni, tantu pe tie nc'è sulu la chiesia e le prediche e me menzu ca nu ssai mancu ci è statu lu primu ristianu ca s'ane fattu pijare pe fessa pe lu pilu de na fimmana.
A - E te pare ca nu nzignavi a castimare? Mo su ssicuru ca te n'essi ttorna cu una de le toi, te canuscu comu piru parazzu! E me crisciu ca vo dici l'Adamu ca se manciò la mila ca li purgiu l'Eva e ficiara lu primu paccatu. E mo, lu Signore cu te parduna e fazza Diu!
C - Pocca, pareddhu! Avutru cca mila, foe lu pilu ca lu ttirò.
B - Sine, puru l'Adamu ccappò de fessa ma ammenu campò, nvece mutu chiempu dopu lu furzurutu Sanzone, pareddhu, cu dane retta a la filistea, sempre pe via de lu pilu, li spruvò ca la forza li vania de li capiddhii e cusì, quannu lu zziccò lu sonnu, ne li tajara rasi rasi e lu putira cusì nturtijare cu sette catine.
A - Pocca! Ma poi quannu li ricriscira li capiddhi, li fessi, li ccise tutti li capi filistei e, comu vose Diu, se ripijara laTerrra Prumisa e fazza Diu!
B - E pocca! Povuru fessa! Ci sape cci li vinne a mposcia quannu mmersò la culonna e rimase squicciatu sutta le petre cu tutti li filistei! Povuru minchia! E foe puru de fiaccu esempiu pe li ristiani de lu nnanzibbanire, ca mmiziò li giappunesi, ca cu l'aerei se fugnuliscavene contru le navi de lu nnamicu e li maumettani ca se fannu sartare a l'aria cu le fasazze chine de pruvele.
C - Chiamili fessi li sciudei, ci l'a criati, ca dopu la morte de tutti li capi filistei, se ripijara, a picca a picca, tutti li tanamenti.
A - Cci ne sai tie! Era la Terra loru, ca ne l'ia prumisa Diu già a li chiempi de l'Abramu e li jutò 'ttorna a lu chiempu de lu Giusuè, quannu se rricosara de lu desertu, dopu la morte de Musè. Era giustu ca se l'ivene rripijare, dopu ca li Filistei se n'erene mpussessati cu la forza, e fazza Diu!
B - Nu me pare cosa tantu giusta a mie. Comu, Diu, Nniputente, Criatore de tutti li ristiani de la Terra, face puru Iddhu a ci fiji e a ci fijasci? Nc'era propiu bisognu cu descia na beddha stozza de Terra, nnanziparte, a li Sciudei?
C - Ci t'a criatu! Cci te ne futti tie de chiru ca vole o nu bole Domineddiu?
A - Dinnanala, dinnanala. Ane ffare sempre lu saputeddhu, iddhu, cu le cose de Diu.
B - Puru ca ista era la vuluntà Sua, nci vulia tantu, a Iddhu, ca pote tuttu, cu li llassa fijare, criscire, comannare e campare an santa pace su dha beddha terra? Cci bisognu nc'era cu se mmenta la caristia e cu mmanna, pe fame, lu Giacobbe cu tutta la razza a l'Egittu? E poi nc'era tutta sta fuddha, mo ca s'erene bituati a dhai, cu li face turnare a la Palistina patennu le pene de l'infernu pe quarant'anni ntra lu desertu? Percé l'ane fatti scire sempre sperti e damerti de cquai e de dhai, a ngiru pe tuttu lu munnu? Percé nu li llassa a mpace, na bona fiata e li ttocca cu lluttene ncora, dopu cchiui de settemila anni ca su passati?
A - Voi na carzosa cu te sciacqui meju la ucca? Sacci ca Domineddiu sape cci face e llassa a li ristiani, l'arbitriu cu se mmentene de suli stessi la Storia, e fazza Diu!
C - Me crisciu ca ci nu nn'ivene uta la Fede, ca l'ane tanuti ccucchiati pe tant'anni, ci l'a criati, li sciudei s'erene, de moi, sparpajati e scancellati de facce de la terra!