PRESICCESI NEL MONDO

LU CCHIANCATU

LU CCHIANCATU

Ciuveddhi ane mai mmuntuvatu stu fattu ccappatu a Prisicce quannu jeu era vagnone: lu paese foe spezzatu a doi quannu la Cumune chiuse, pe' mijuria, la vìa Donnica ca moi se chiama Corsu Italia.

Stìa cu spiccia lu '46 e pe' la prima fiata le fìmmene de vintunanni e cchiui vutarene apparu a li màsculi cu se scùcchene lu Sinnucu ca nchianò a la Cumune a scanciu de lu vecchiu Podestà nnuminatu de Lecce.

Mprima mprima istu se ncorse ca la meju via de lu paese, via Dònnica, tania lu cchiancatu chinu de concateddhe ca quannu chiuvìa se nchìvene d'acqua e le pizzoche cu bannu e bennu de la Chesia  Matrice ttuccava cu camìnene a sartarizzi, ripa ripa a lu parite cu nu se mmòddhene li pedi. 

Cusì, nu paru d'anni dopu, la Cumune dese manu a nu capu mesciu ca schiancò tutta la via Donnica, ccumanzannu de nanzi a lu pede de pignu de Mussulini fenca a la Chiesia Matrice. 

Lu schiancamentu nzignò a primavera cu la mira ca pe' lu state bbincìvene cu sparpàjene 'na lattéra de fricciu e cu stènnene susu lu mantu de catrame, tuttu cu la mira mo' ca spicciavene prima de la staggione de l'acque. 

Tuttu sciu lisciu fenca nu spicciara de scàppare le chianche a una a una e le mmuntùnara a mmenzu a la via, poi nu se ne sippe nenzi cchiui,  pe' n'annu sanu.

Se dicia ca era tuttu fermu percé lu Cuvernu de Lecce vulia la ricchiancatura pe' la via cchiù mpurtante de lu paese e nnu la stisa de nu patu de catrame.

Dhu nviernu me lu ricordu bonu ca me ttuccò cu jutu sirma ogni sira cu trase le vulie de susu a lu trainu fenca a intra a lu purtune de casa percene ìa ttuccatu cu llassa a dha fore lu trainu e lu scialabbà alla strittala vicinu a la putea de mesciu Carmelu Stannardu. 

Pe' tutta la ntrata me ttuccò cu carrisciu li menzi sacchi de vulie a ncutursu caminannu a zumpareddhi de 'na chianca a l'àvatra stannu ncortu cu nu scurlisciu e cu ssammuttu.

Puru sirma se la ricurdava bona dha nvernata percé la viscilia de Santu Ndrea, quannu turnò a casa de la purgissione, se ncorse ca nu nc'era cchiu lu trainu a rretu a lu vicu e ttuccò cu ba' cu se lu rricoje de menzu a la chiazza a dhunca l'ìvene bannunatu li cagnulastri ca se l'èrene pijatu cu carrìscene tàcchiri pe' la focareddha.

Menumale ca poi la Cumune la pijò la decisione e rrimise le stesse chianche ssuzzate e squatrate a la meju a corpi de mazza e sciamarru ma durara picca ca poi la stìsara deveru la catrame a dispiettu de li nticari.