« MEA CULPA | SINE O NONE » |
(Da "Strolacamenti de 3 vecchiareddhi")
LA LUNA
C - (rivolto ad A) Jerisira te spettavene a lu barra pe lu tressette e nu si banutu!
A - Iti raggione, nusterzu me scurdai cu be lu dicu ca tania de pulizzare la utte e jerisira
m'aggiu scutursatu cu mujerama, cu mmintimu lu mieru ntra le dammiggiane.
C - Tie nu poti fare sporzi, statte ncortu ca cu lu core nu se scherza!
A - Teni raggione ma ci nu lu fazzu jeu, ci lu face? Fijama lu prevete? Pocca nah! Cu la scusa de la Missa, li buttijioni vannu e vennu e mo fazza Diu!
B - Ciuveddhi te dice cu nu le faci le cose ma ttocca cu dai chiempu a lu chiempu, ttocca cu faci le cose a ppicca la fiata.
A - E comu facia, chiru lu mieru nunn'è ca putia spettare!
C - Percé si no se ne fucia? E a dhu va, sempre ntra la dammiggiana li tocca, ci l'a criatu!
A - Nunn'è ca putia fare menzu jerisira e menzu stasira?
B - Percé timivi cunussia te pardivi lu tressette puru stasira?
A - Ma faciti li fessi o siti fessi de daveru?
C - T'ai scurdatu cu ne dici ca nu beni cu sciochi e va bene e mo ne nzurti dicennu ca simu tuttidoi fessi?
A - None mo, nu m'è mai passatu pe la capu nu pinzieri ucuale! Sulu ca voju ssacciu ci
nu sapiti ca la utte se scummara cu la luna china, quannu è quintadecima e ieri, era!
C - Jeu crisciu e nu crisciu a ste minchiate ci l'a criati!
B - Ma cci dici mmenu! Stamu a lu terzu millenniu e ncora dai retta a le sanze de li nnantisciuti? Sai cci li face la luna a lu mieru de la utte tua? Nenti de nenti li face!
A - E' rrivatu lu "sacciu tuttu jeu"! Li nonni de li nonni nosci stivene ncorti: cu vannimene,
cu simmene, cu portene le vestie pe la mprenatura, cu travasene lu mieru, cu mintene l'ove sutta a la fiocquala e mo rria issu cquai, ca nu sulu nu cride a Diu ma mancu a le cridenzie ca se tramannene de fili a filori, de quannu lu munnu è munnu e fazza Diu!
C - A mie me parene tutte fessarie, su comu le mmacarie de le macare, certu ca ci unu
nasce sutta a la Statila è diversu de unu ca nasce sutta a lu Majatu o lu Scurpiune.
A - O cridi a tuttu o nu cridi a nenzi. Anzi me crisciu ca ttocca cu cridimu de cchiui a lu nflussu de la luna ca è mutu cchiu vicina de le stiddhe, ca stannu a pizzu de munnu!
B - Nu be pijati pena de istu sine e de istu none, ca la luna, li pianeti, lu sulu e l'avetre stiddhe se ne futtene de nui a cquai su la terra.
C - E llora l'antronumi suntu busciardi?
B - Tie cunfunni l'astrolugi cu l'astronumi, comu a li chiempi de lu Calilei, ma moi suntu n'avatra cosa. Li primi nduvinene la furtuna facennu ficuzione a lu giurnu ca unu è natu, l'avitri studiene lu celu cu tutte le palle ca girene e nci ne suntu deveru tante!
A - Ma nc'è puru ci dice ca a lu primu quartu de luna se ponnu chiantare: li paseddhi, le fave, li pasuli, ecc., mentre all'urtimu quartu: la nzalata, le cicore, li cavili, li pasuli piccinni, li pummadori, li cucummarazzi ecc., ecc..
C - E li fanucchi se la pijene de nanzi o de taretu, la cobba?
B - Menumale ca tie la piji a ridire! Facimu ci pe ci sa ca de veru sta luna pote jutare li samenti cu sciscene, cci centra ci è china o ci è vacante? Ci è lu primu o l'urtimu quartu? Nunn'è ca moi nc'è la luna e poi se ne vane. Iddha stane sempre cucchia cucchia a nui sulu ca se face bidire quannu lu sule la duma tutta o a feddhe.
A - Li ntichi llora erene fessi cu cridene.
B - Nu ssapivene le cose ca sapimu moi. Se cridivene ca lu sule e la luna se ne scivene e
poi turnavene. Se cridivene ca lu sule, manu manu ca lu giurnu scurcìa, se ne scia e tutti l'anni stivene paurusi cunnussia se ne scia e nu turnava cchiui e cusì quannu le sciurnate nzignavene a llugnire (lu 25 de dicembre), facivene la festa de lu SULE NCORA VIU ca poi, canciannu cuvernu, è ddavantata la festa de Natale e "fazza Diu", lu dicu jeu, sta fiata!
A - Stia cu pinzieri ca ncora nunn'ivi castimatu! Speriamu ca Diu te tramuta e fazza Diu!
AREA PERSONALE
TAG
CERCA IN QUESTO BLOG
MENU
ULTIMI COMMENTI
Inviato da: cassetta2
il 29/05/2023 alle 18:33
Inviato da: Mr.Loto
il 21/08/2020 alle 17:39
Inviato da: sciroccu
il 22/04/2020 alle 13:10
Inviato da: cassetta2
il 22/04/2020 alle 11:06
Inviato da: cassetta2
il 20/11/2019 alle 16:11