il sassolese doc

PREGHERA AL CROCEFESS

Sgnour a soun che’ davanti a Vo’

con tòta la muntagna dal mee deblèsi

a dmander’V un quel;

oddio, Vo’ al savii, supereb cumasoun, tropi volti a m’illod

ed pser fer da per me’,d’arangerem acse’

ch’an vrev mai arbaserem a dmander  

meint’r invece, al dev ameter,

a soun soul un pov’r em

atrat dagli insulfanéd dal mel! 

 Vo’, gnànd in tera, aV sii fat noster fradel

e per amour an ‘I arnunsiee

a cargherEv di noster debit!

E al prémi a ‘sta Vostra generositee

l’è cla crous ed legn, ormai tarulìda,

dove doméla an fa’ a V’am inciuldee

e in d’agh si armes anchéra

per ch’investimeint sbaliee ch’a continuam a fer!

Incoo pero’ am soun fat curag e con

al cor in man aV soun gnu a cater!

Se’, l’è veira, as sam gia’ vest giovede’sant pasee

quand, in procesioun, mustràndEv nud’ a tot

aV si fat streda tra  cal nostri bancaréli  de scifléin e tiremòla

che per vender i V’han  strichee anch al pasagg!

Perdunes Geso’, gia’ sol Calvaria Ivi capii

ed che pasta a sam fat: seimper

prount a tor seinsa mai rimgrasier !

Scusem ma adesa aV dev parler

a quatr’oc fora dal branch:

quant a Ve dmand an e’ per me

ma per un ch’a cgnés:un boun em, séimplis,

generous, lavuradour

che da teimp as trova in un litéin d’usdel

guardee de’ e not da la soo spousa

a la merce’ ed medseini e paliativ umiliant e inconcludeint.

Geso’ s’aV posia dir:

fee Vo’perche’ a savii

quel che realmeint l’è al soo bein;

quant pareint e amigh i vreven a vAl psii immaginer

ansi Al lisi in i tant suspir e

preocupasioun chi tratenen in cor

ma ed sicur  Vo a vdii pio’ avanti!

Se’ l’è veira la sofereinsa, e che’agh n’è tanta,

s’l’umelia la nostra natura  

l’ardùs pero’ i noster debit

preparand al pasaport per gnir’V

a cater a ca’ Vostra, quand Al decidri!

E Vo’ Madunéina, ch’aV dee tant

da fer per al noster bein

cunvinsìs, che nonostant tot,

an sam abandunee, lasee da per nueter cuma a meritereven

perche’ ‘na mama l’an s’descòrda mai di soo fio!

Madunéina sa cherdii gii quel

a VosterFiol come cla volta a nos

dove al vein l’era finii perche’,

che’ da nueter, a rescia ed finir la speransa!

E aloura: grasia per tot quelch’aI seimper fat

in sileinsi, seinsa rumour

e grasia anch adesa per quant ed sicur a farii

perche’a la fin, in tot al manér

a vins’ra’ seimper e soul Lo’:

Voster Fiol Geso’ e al Soo gran amour!