Eufrasio Burzi

JESUS CHRIST 2013

So’ duemila anne e cchiù

ca trascine sta croce…

E arripuosete nu poco!

Magnate quacche cosa,

bivete ‘na coca cola,

fumate ‘na sigaretta!

Nun ‘o vide comme te sì ridotto?

Nu scheletro tutto pelle e ossa!

Nun è pe’ cattiveria,

ma fiete ‘e cane muorte!

Da quand’è ca nun te lave?

E poi, cagnate sta tunica,

ca me pare nu sacco p’’e patane!

Guagliò, tu sì Gesù, ‘o figlio ’e Dio,

mica nu fesso qualunque!

Che figura ce fai fa’ a’’o Pataterno?

Nun ‘o vide c’’a gente te ride arreto?

Si, va buono l’umiltà, la beata povertà,

ma me pare ca staje nu poco esageranno!

E po’ sta croce ‘e legno massiccio…

Nun ‘o ssaje ca mò s’usano

‘e croce in fibra di carbonio?

So’ resistenti ‘o stesso, ma accussì leggere

ca ‘e scale do’ Golgota te faje a quattro a quattro

senza sprecà nu grammo ‘e fatica!

E visto ca mò ce stammo, eccoti vinte euro,

va da Peppe ‘o barbiere

e fatte barba, capille e shampoo,

ca nun me pare affatto nu cristiano…!

“Ma io debbo salvare il mondo”…

Ma quale mondo e mondo!

Accà, si vaje annanze accussì

nun te salve neanche tu!

“Ma è scritto che io debba morire

per la salvezza dell’umanità”…

Alle, mò accumenza cu’ ‘a solita storia!

Gesù, ‘o tiempo è passato, ‘o munno è cagnato…

Va nu poco a Roma, addò San Pietro

e vide nu poco ca t’hanno cumbinato

e scagnuozze dell’Apostolo tuo,

‘o piscatore, ‘o taglia recchie,

chille ca t’ha rinnegato tre vote

prima ca ‘o gallo cantasse

e se avesse cantato dieci vote,

dieci vote t’avesse rinnegato!

“Pietro, su questa pietra

edificherò la mia Chiesa”…

Sti cazzi, e che chiesa t’hanno attrezzato!

Mò, si tu t’appresiente allà,

accunciato ‘e chesta manera

chille te danno nu caucio ‘nculo

e te fanno ruzzulà pe tutte ‘e scale!

Si, allucca pure ca sì Gesù…

Nisciuno ce credarrà, diranno ca sì nu pazzo!

E che cazzo, nun t’hanno riconosciuto

quanno sì risuscitato dopo tre juorne,

figurammece mò ca so’ passate duemila anne!

Chille se so’ misse tutti in su.

Stanne chine ‘e quattrini

mò tengono pure ‘na banca

e tu nun saje quante ‘mbruglie ce fanno!

Se vesteno co’’e tuniche ‘e seta pura

chelle griffate, all’urdema moda

e se sparano ‘e pose annanze ‘a ‘e fedeli!

Predicano ammore, moralità e castità,

e intanto se fottono ‘e creature ‘nnucente!

Siente a mme, Gesù, lassa sta’ sta croce…

tanto in Palestina, in Giordania, in Israele

d’’allora niente è cagnato.

Stanno sempe a fa’ cane e jatte!

Oggi ce sta ‘a televisione, internet

network e pure l’anima ‘e chi t’è muorte!

E’ inutile ca tu vaje cammenanno

annanze e arreto comme a nu scemo:

“Beati gli ultimi perché saranno

I primi nel regno dei cieli”…!

Chille stanno accussì ‘ncazzati

ca sì te ne viene cu na strunzata e chesta

t’abboffano ‘e mazzate!

E tiempe so’ cagnate, tutto è cagnato…

e sì tu continui cu chesta tiretera

te rinchiudono dint’’a nu manicomio

per gravi forme di delirio mistico – religioso!

Statte ca guagliò, siente a me

Simme ‘na famiglia modesta, semplice, ma onesta.

Nu piatto pe' te sempe ce sarrà;

pecché addò se magna pe’ sette,

se pò magnà pure per otto

e nu posto per durmì se trova sempe…

basta ca ci strignimme nu poco ‘e cchiù.

‘A sera, pe' fa’ piglià suonno a ‘e guagliune,

magari ce raccunte quacche bella parabola de’ toje…

Ah, a proposito che sigarette fumi?

“I.N.R.I. senza filtro”…

Dalle, ma chiste tene proprio ‘a capa tosta!

Gira e rigira sempe là va a fernì!

Sta marca è fuori commercio da 2000 anne…

E fatte ‘na Marlboro… perdio!

Eufrasio Burzi