Alpina - Alma

HEUUU, SA DHEMB DHIMBJA!

HEUUU, SA DHEMB DHIMBJA!

Heu..!
(ai më sheh me mëdyshje,
prej tingullit që
dëgjoi a s'dëgjoi gjë?)
babushi im,
ka lënë mustaqe të bardha mbi buzë
ama ka dhe një "kokë-lakër" pa flokë,
(sytë gërshetoj me nënën)
ajo gjithnjë e brengosur,
ama sytë i bëhen më blu
prej lotëve të lagur.

Heu...!
Kërkoj muzikën e Vivaldit
(vetëm ai di t'më kuptojë,
me raste jo gjithmonë)
e nuk di si dhe pse
të gjitha të qeshurat e qytetit
madje dhe motorrët e naftës
që krijojnë energjinë e munguar,
bëjnë rezonancë arpezhiale
brenda daulles time të veshit,
(këmbët vallëzojnë kuturu).

Heuu..!
Qëndroj shtrirë në të njëjtën lartësi,
(pa frikën se rrëzohem)
pezull mbi horizontalen e bardhë,
twist kërcen një pulë e rrjepur në pjatë,
spageti luan tangon me pirunin dhe salcën,
(ah, pulë mashkull që s'bën dot një supë)
po të tjerat ç'janë??

Heuu..!
Nuk shoh as bukur dhe as qartë,
po festoj javën rutinë
me ushtri antitrupash në gijotinë,
m'u helmuan rruazat e bardha
në mesnatë.

Heuu..!
Ç'temperaturë e lartë
(faqet e mureve janë akull)
televizori presion i qartë,
(nënokja e babushi janë stampuar
para ekranëve)
ndryshe do ishin tretur prej halleve.

Alma Begaj - Durrës 11.03.2015