PRESICCESI NEL MONDO

CHIEMPI DE TANNU E CHIEMPI DE MOI

STROLACAMENTI

A - Iti ntisu de dha vagnona de Specchia, pareddha, l'ane ccisa lu zitu!
B - Iddhu ccidia jeu, piezzu de gnalaratu!
C - Ca moi, ci l'a criati li vagnoni de moi nu ssapene mancu cci bolene iddhi stessi.
A - Na fiata, quannu li vagnoni tanivene a mente le cose de Diu, nu ccappavene ste cose fiacche e mò fazza Diu!
B - Lu Diu tou però l'ia pututa rruciaddhare la manu prima cu la ccide.
C - A chiempi nosci mancu le putivene vardare a nfacce le vagnone, ca bbasciavene la capu o se giravene de l'avatra menza. Moi tennu tuttu e nu su cuttenti mancu, ci l'a criati!
A - Pocca! Nui ttuccava cu ne ssimu fuscennu de la scola cunussia le fimmene ssivene prima de nui e nu ne le putivene custare. Moi nvece se zzicchene, se mbrazzene e se buzzene puru a menzu a la via, ca su scustumati iddhi le mamme e li siri ca nu li spezzene li musi. Nu nc'è cchiui religgione e fazza Diu! Lu vidi (rivolto a B) cci se ccappa quannu nu timimu cchiui lu diavulu e ne lluntanamu de chiru ca Nostru Signore n'ane cumannatu?
B - Ci nc'è lu diavulu ca ne face fare li paccati nc'è puru l'Ancilu Custode ca ttuccava cu ne varda e cu ne tene mente. A dhu stava l'Ancileddhu de la vagnona quannu dhu fessa l'ane ccisa?
A - Ca cci simu pupi de pezza ntra diavuli e Ancili, Domineddiu n'ane fatti cu panzamu cu la capu noscia e putimu pijare la via bona o la via fiacca, simu nui ca imu scucchiare ntra lu bonu e lu fiaccu e fazza Diu!
C - Nunn'è ca mo nzignati cu be scurnicchiati unu l'avutru, ci va criati, ndrafascati nu picca. Jeu quannu sentu cuntare de ristiani ccisi me vene a mente sempre mesciu Ndrea Giulitti, bunattanima.
B - Mesciu de cci? Lu Ndrea Giulitti nunn'erta mesciu de nenzi e ciuveddhi lu chiamava "mesciu" ca nu tania nuddhu mistieri.
A - Jeu me lu ricordu a ngiru pe' Prisicce. Caminava quetu quetu, "bongiornu e bonasera a ssignuria" a li ristiani ca ffruntava ma nu cuntava mai cu ciuveddhi.
B - Nunn'è ca se la passava mutu bonu, pareddhu!
A - Se vutava sutta a li Sarracca e a dhai tafanaddhava facennu chiru ca putia pe' nu stozzu de pane e siccumu ca tania lu pede bonu, a fiate lu mmannavene fenca a Lecce a la mpede cu porta a ncoddhu nu saccu o na balice.
C - E se scaffava fenca a Lecce a la mpede?
A - Pocca! Caminava cu passu lentu e nu se farmava mancu cu mancia ca pizzulisciava gnittantu cu le fiche siccate ca tania a mposcia.
B - Certu pareddhu fice na fiacca fine.
C - Lu truvara cu la capu spaccata ntra la vigna a ll'agnulu ca face la via de Sarve cu chira ca vane a li Saccursi. Me la ricortu ncora dha mmane mprima, facia friddu ca ia puru nivacatu nu picchi. Nui, jeu e avitri vagnoni ca scivene a la scola a Dalessanu cu la bricicletta, rrivati a llagnulu vittime li carbinieri e ne fermamme cu vardamu. Ci l'a criati, l'ivene massacratu!
A - Nu se sippe mai ci l'ia ccisu, pareddhu e mò fazza Diu!