PRESICCESI NEL MONDO

LU DIAVULU E L'ACQUSANTA

STROLACAMENTI

B - Cci faci, sulu si banutu?
A - Lu "C" osci nu vene, ca nu stane bonu e fazza Diu! Passannu l'aggiu data vuce e mujerasa s'ane nfacciata e m'ane dittu ca stane curcatu cu doja de cutursu.
B - Pareddhu! Ci mancu stasira esse, crai lu scià truvamu. E mò suli suli a dhu vo' cu sciamu?
A - Ne nchianamu su la Madonna e fazza Diu!
B - Ma si fessa! E ci la crapantamu tutti doi de susu!
A - Cittu diavuluranne ca tie nu l'ai mancu mmuntuvare la Madonna ca de la ucca tua essene sulu le vampe de lu diavulu.
B - L'ai mmuntuvata tie ca jeu nu la sci panzava mancu.
A - Mo' ca simu nui do' suli, voju cu sacciu comu è ca tuttu de paru nu cridi a nnenzi.
B - Ane de tantu ca m'aggiu fattu persuasu ca la storia de Adamu è nu cuntu comu tanti avitri, passatu de ucca a ucca e poi scrittu de li Sciudei pe li Sciudei de tannu,
A - Ma ci minti la Fede poti cridire puru tie a dhu cuntu, scrittu comu dici tie pe li sciudei de tannu, ma ci penzi ca de na sciudea de chiri è natu lu Signore nosciu Gesucristu, vidi ca dhu cuntu ntaressa puru nui ristiani Ristiani.
B - Ma jeu la fede nu la tegnu e nu crisciu a nenzi.
A - Chiudi l'occhi e penza a lu Criatu, a la terra, a l'animali, a le chiante e a lu celu cu tutte le stiddhe ddarlampanti e poi vidi la Nniputenza de Diu ca de nenzi criò puru l'ommu e la fimmana e li mise ntra nu sciardinu beddhu e ranne a cquai su sta terra.
B - E a tie te pare mò ca Domineddiu ntra mijara, mijara e mijara de stiddhe ca dici c'ane criate ne va pija una, mancu tantu ranne, misa a mpizzu de lu munnu cu tante coculeddhe ca li girene tornu tornu e ne scucchia UNA de ste coculeddhe tutta mmacculizzi e  china de carotti de dhu nci esse lu focu e va chianta ogni bene de Diu e nci mpizza lu tataranne de li tataranni toi e dice: tie ttocca cu fatichi e a mujerasa: tie ttocca cu faci tanti fiji.
A - Ca a cquai stane tutta la Grannezza de Diu e ... fazza Diu!
B - None a cquai stane la fessaggine tua! E g'è tutta tua ca nu te la poti mancu scuntare  cu Domineddiu. Ma a la scola nunn'ai mparatu nenzi? Nunn'ai mai ntisu cuntare d' evoluziunismu?
A - Cci ccentra mo stu fattu, Chiru è n'avutru cuntu. A mie la Fede mia me dice c'aggiu cridire a Diu e basta e fazza Diu!
B - Cu l'occhi chiusi poti fare cci boi, ma ci li apri comu faci cu cridi ca 7000 anni rretu Domineddiu criò tuttu lu munnu l'animali e li ristiani ci poi vidimu le cozzemateddhe ntru lu tufu de le tajate ca tennu cchiui de nu mijone d'anni? Ci l'ane criate?
A - E cci bo' ne sacci tie! Ci sinti tie ca te menzi ca poti capire la Nniputenza de Diu? Tanti ristiani cu la capu a ncapu pe mijara de anni annu cridutu a Diu Nniputente e Criatore de lu munnu e a Fijasa Gesucristu, s'annu fatti ccidire pe la Fede buttannu lu sagnu nnucente e annu scrittu prufizie su lu nnantibanire, sarmi e precarizzi e .... mo veni tie cacchiu cacchiu e boi cu scancelli tutta la Storia Sacra? Ma preca Domineddiu cu te ridescia la Fede e fazza Diu!