PRESICCESI NEL MONDO

AUGURI

Puru tannu lu Mmammineddhu, comu puru moi, nascia la notte de Natale. Nu be dicu mò li presciarizzi de nui vagnoni quannu ntra la chesia bonsignore, nturnisciatu de previti e prevatuzzi, mmusciava tisu lu canisciu cu intra la Mmammineddhu de cartapista. Li ranni cantavene la Missa a do' vuci ccumpagnati cu l'orgunu. Nzignavene li masculi de ntra lu ccoru e rispunnivene le fimmene de frunte a l'artare. Ma cchiui de tuttu me piacia quannu, dopu l'itemiseste, mesciu Giuvanni ntunava lu "tu scinni dalle stelle" a chiempu de valzer e tutti nui, masculi, fimmene e vagnoni nzignavene a cantare a cchiui nu puzzu cu tuttu lu fiatu ca tanivene a ncorpu.
Quannu turnavene a casa, ci ivene fattu lu presepiceddhu, mama pijava lu Mmammineddu piccinneddhu piccinnneddhu e lu mintia a menzu a la Madonna e Sa Giuseppe, sulamente ca nu nc'era né lu ciucciu né lu voi e nemmancu le pequere e li Rremmaggi. Me ricordu ca se dicia ca se facivi lu Presepiu pe' n'annu ttuccava cu lu faci pe' sette anni filati si no ccappavi quarche cosa de fiaccu. Tantu lu facivi o nu lu facivi quarche cosa de fiaccu la ccappavi sempre, sulu ca ci scamaddhavi n'annu e ccappavi la minchiata nc'era sempre ci dicia: te la dicia jeu!
De pedi ne tanivene tanti, chiri de vulia, de fica, de pignu, de maranciu ma chiru de Natale cu le palle e le luciceddhe culurate, a dhi chiempi, nu lu tanivene. Però Sannicola nc'era puru tannu ma se ne stia a Bari ntra lu stipone, nu scia a ngiru, nu purtava rricali ca nc'era la guerra ma mancu quannu se spicciò nnusse nenzi, ca chiru tannu era mutu povareddhu poi se ne siu a l'Avutru Munnu, fice furtuna, se canciò lu nume davantannu Santa Clause e se rricchiu e moi lu vidimu vistutu cu le rrobbe nove russe, cu tantu de barba janca logna logna ca dane rricali de cquai e de ddhai. Maperò li rricali lu Mmammineddhu ne li facia lustessu. Tutti l'anni a casa mia s'ia pijata la sansa cu ne nnuce, a mie e li frati mei, nu maranciu e na faccimora padunu. Poi cchiu ranniceddhu me ncorsi ca a nui lu Mmammineddhu ne vulia mutu bene percé a l'avitri vagnoni nu purtava mancu la faccimora e nemmancu lu maranciu.
Tannu lu munnu girava cusì: a ci mutu a ci picca e a ci nenti, e puru moi me pare ca gira cusì, no? Nunn'è canciatu nenzi!
Pe' ste feste pijati lu meju ca ve ccappa e stative prisciati.
Tocca cu be llassu c'aggiu fare ncora li purciaddhuzzi.  AUGURI.