il sassolese doc

AL  SANTETROUNC

A gh’è a Sasòl in ‘na piàsa, davànti al gràn Palàs,

atàch ai pree dàl Péleg e al légh dàl Funtanàs,

aréint ai gràn lochee d’l’antìgha Pagerìa,

‘na césa arfàta un téimp per vléir ed la Sgnurìa.

As dìs che da chàl bàndi a gnésa infàti un de’,

un ùmil fratsél che un pòch che’ às ferme’

e pròpria in ch’l’ucasiòun ‘na guérdia la se frìva

e al free preghànd al Sgnòur, subét al la guarìva.

Déinter a ‘sta’ césa, ch’l’arcòrda Sàn Fransésch,

a gh’è ‘n’altér speciél che tòt Sasòl al cgnés,

l’è quél dàl Santetròunch, presiòusa ereditee

dàl nòster bél paéis e d’la comunitee.

L’è stee un regàl di Estéins

chi al riscatén un téimp

da un sìt luntàn d’l’Oriéint

pér regalérel po’ al cùr d’la nòstra géint.

L’è ‘na cròus ed légn scùr

pìna de sprooch bee dùr

in da gh’è un Crést tachee

ch’al sùscita pietee.

Còn màn e pe’ inciuldee,

‘na grànd frìda al custee,

tànt spréch ed sàngh’v adòs

e lìvid so’ ogni òs.

Ecco al padròun dàl ménd! Còn spìn l’è incoronee,

i òcc i éin més saree,

la tésta l’è pighéda,

la bécha so’ sbrindléda!

 Acsè às fa’ ved’r a tòt,

quànd, comòs e mòt,

al Giovedé  in tànt

àgh basàm i pè sant!

Se po’ quelchdùn fadìgha, a gnìrEl chè a catér,

Lo’ àn pòl fér a méno d’andér’l a salutér

pasànd in procesiòun

bendànd ògni cantòun.

I Sasuléis da séimper, pér vécia tradisiòun,

la mòrt anticipéda i arcòrden ed Nòster Sgnòur;

i Al préghen con fidòcia e gràn venerasiòun

 e a Lo’ i ghe dmànden séimper salùt, pés e lavòur!

D’atàch a la Soo cròus l’ha un dòbi al Santetròunch:

“ Ma quii che incoo i m’préighen còn tànta devosiòun,

s’ràni cumpàgn a quii che un de’ cho’l‘pélmi in màn

soquànt giurnédi dòp im cunsgnén ai Romàn?”

Geso’ perdòun, pietee, purtròp spés a cascàm

 e Vo’ al savii, a sàm ém

bisgnòus d’és’r aiutee

per an finìr danee!

Incoo, Giovede’ Sànt,

Sgnòur an Ve dmànd pio’ ed tànt

ed fiànch a Ve staro’ còme al ladròun pintii,

cunvìnt che alméno Vo’, sicùr am capirii! 

Geso’ l’è pòch cunvìnt

ma al fa fìnta ed gnìnt

l’è tànt al béin per tòtt

ch’l’ingògna e l’armàgn mòtt!