SEMI DI GIRASOLE

Post N° 336

Lu me' valuri

La peddi: tra travagghiu, petri e spini,
la terra si lu pigghia lu suduri,
lu salutu: l'amici e li vicini,
figghi e muggheri: l'affettu e l'amuri;
l'odiu, ppi li latri e l'assassini,
resta a lu feli nzemi a lu rancuri;
li versi mei, misiri e mischini,
vanu ppi giudicalli, li litturi.

La fidi: a la Madonna e lu Signuri,
na li quaterni: la me' fantasia,
l'affettu: a li parenti e ginituri,
e a lu travagghiu: tutta la valìa;
li sonni beddi di li notti scuri,
ccu li spiranzi cercunu la via,
e lu me' corpu, senza chiù valuri,
si porta li segreti, squagghia e sbria.

Placido Benina