La poesia napoletana

FERRAGOSTO BAGNATO...FERRAGOSTO 'NGUAIATO.....poesia napotelana

'o Ferrausto

Piscature e marenare,

varche ‘nterra ‘a rena

mare, mare e  mare,

 cca ‘o tiempo nun è sereno,

‘mbrullune e segge

me pareno saette,

so’ comme schegge

‘o viento ll’arricetta,

na varca ‘e salvataggio

vola ‘ncoppe a ll’onne…

certo ce vo’  curaggio

pe’ sarvà a duje nonne…

ca pe fà nu poco ‘e sentimento

aummo aummo se sò  alluntanate,

ma ‘o maletiempo l’ha pigliate

avevano fatto ‘o cunto senza viento.

Nu cappiello pe’ na mez’ora

‘ncielo, abballa l’alli –galle,

e p’ ‘o piglià nun s’é accorta ‘a signora

c’ ha perzo ‘a cullana ‘e curallo.

Chiove, chiove e chiove

dint’a città strate allagate,

nu criaturo nun se trova

ma pe’ furtuna è stato sarvato…

duje querce stanno ‘nterra

l’ha abbattute ‘o maletiempo …

‘stu tiempo pare na guerra…

stà sempe all’erta…sempe.

Che brutto Ferrausto ch’ è stato!

‘A gente ‘a casa se ne stà turnanno …

J’ penzo ca è gente furtunata :

“Chello c’ha visto ‘o stà raccuntanno!!”

15 Agosto 2010

Massenzio Caravita