omerostd

2 NOVEMBRE 2017

Con l' avvicinarsi della giornata dedicata ai defunti, desidero rendere omaggio al grande Totò.

'A LIVELLA.

Ogn'anno, il due novembre, c' è l' usanza
per i defunti andare al Cimitero.
ognuno ll' adda fa' chesta crianza;
agnuno adda tene' chistu penziero.

Ogn' anno, puntualmente, in questo giorno,
di questa triste e mesta ricorrenza,
anch' io ci vado, e con dei fiori adorno
il loculo marmoreo 'e zi' Vicenza.

St' anno m' è capitata 'n' avventura ....
dopo di aver compiuto il triste omaggio.
Madonna ! Si ce penzo, a che paura !,
ma po' facette un' anema e curaggio.

'O fatto è chisto, statemi a sentire:
s' avvicineva ll' ora d' 'a chiusura:
io, tomo tomo, stavo per uscire
buttando un occhio a qualche sepoltura.

" QUI DORME IN PACE IL NOBILE MARCHESE
SIGNORE DI ROVIGO E DI BELLUNO
ARDIMENTOSO EROE DI MILLE IMPRESE
MORTO LI 11 MAGGIO DEL '31."

'O stemma cu 'a curona 'ncoppa a tutto ....
... sotto na croce fatta 'e lampadine;
tre mazze 'e rose cu na lista 'e lutto;
cannele, cannelotte e sei lumine.

Proprio azzeccata 'a tomba 'e stu signore
nce steva 'n 'ata tomba piccerella,
abbandunata, senza manco un fiore;
pe' segno, sulamente na crucella.

E ncoppa a croce appena se liggeva:
" ESPOSITO GENNARO NETTURBINO ":
grardannola, che ppena me faceva
stu muorto senza manco 'nu lumino!

Questa è la vita! 'ncapo a me penzavo ...
chi ha avuto tanto e chi nun ave niente!
Stu povero maronna s' aspettava
che pure a ll' atu munno era pezzente ?

Mentre fantasticavo stu penziero,
s'era ggià fatta quase mezanotte,
e i' rummanette 'nchiuso priggiuniero,
muorto 'e paura .... nnanze 'e cannelotte.

Tutto a nu tratto, che veco 'a luntano ?
Ddoje ombre avvicinarse 'a parte mia ...
Penzaje: stu fatto a me mme pare strano ...
Stongo scetato.. dormo, o è fantasia ?

Ate che fantasia! era 'o Marchese:
c' 'o tubo, 'a caramella e c' 'o pastrano;
chill' ato appriesso a isso un brutto arnese:
tutto fetente e cu na scopa nmano.

E chillo certamente è don Gennaro ...
'o muorto puveriello... 'o scupatore.
'Int' a stu fatto i' nun nce veco chiaro:
so' muorte e se retireno a chest' ora ?

Putevano sta' 'a me quase nu palmo
quando 'o Marchese se fermaje 'e botto,
s'avota e, tomo tomo ... calmo calmo,
dicette a don Gennaro: " giovanotto!

Da Voi vorrei saper, vile carogna,
con quale ardire e come avete osato
di farvi seppellir, per mia vergogna,
accanto a me che son blasonato!

La casta è casta e va sì, rispettata,
ma Voi perdeste il senso e la misura;
la Vostra salma andava, si, inumata;
ma seppellita nella spazzatura!

Ancora oltre sopportar non posso
la Vostra vicinanza puzzolente,
fa d' uopo, quindi, che cerchiate un fosso
fra i vostri pari, tra la vostra gente."

" Signor Marchese, nun è colpa mia,
i' nun v' avesse fatto chistu tuorto;
mia moglie è stata a ffà sta fesseria,
i' che putevo fa' si ero muorto ?

Si fosse vivo ve farrie cuntento,
pigliasse 'a casciulella cu 'e qquatt' osse,
e proprio mo, obbj ...'nd' a stu mumento
mme ne trasesse dinto a n' ata fossa."

" E cosa aspetti, oh turpe malcreato,
che l' ira mia raggiunga l' eccedenza ?
Se io non fossi stato un titolato
avrei già dato piglio alla violenza !"

" Famme vede'... - piglia sta violenza ...
'A verità, Marche', mme so' scucciato
'e te sentì; e si perdo 'a pacienza,
mme scordo ca so' muorto e so' mazzate !...

Ma chi cride d' essere... nu ddio ?
Cca dinto, o vvuo' capì, ca simmo eguale ?..
.. Muorto siì tu e muorto so' pur' io;
ognuno comme a n' ato è tale e qquale."

" Lurido porco ! ... Come ti permetti
paragonarti a me ch' ebbi natali
illustri, nobilissimi e perfetti,
da fare invidia a Principi Reali ?"

" Tu qua' Natale .. Pasqua e Ppifania !!
t' 'o vvuo' mettere nncapo.. 'int' a cervella
che staje malato ancora 'e fantasia ?
' A morte 'o ssaje ched' è ? E' UNA LIVELLA.

'Nu rre, 'nu maggistrato, 'nu grand' ommo
trasenno stu canciello ha fatt' 'o punto
c' ha perzo tutto, 'a vita pure 'o nomme;
tu nun t' he fatto ancora chistu cunto ?

Perciò, stamme a ssentì .. nun fa' 'o restivo,
suppuorteme vicino - che te 'mporta ?
Sti ppaggliacciate 'e ffanno sulo 'e vive:
nuje simmo serie ... appartenimm 'a morte !"