La poesia napoletana

PE' NUN CE SCURDa'....ANNALISA DURANTE

Na stella

Ll’oucchie duje brillante

na resatella ce te ‘ncanta,

na cerasella pe’ vucchella

cu na faccella ‘e scugniezzella.

Annalisa comm’era bella

‘sta guagliuncella ‘e Furcella,

Cresciuta tra mille viche

panne spase e madonne antiche,

addò ‘ncopp’ ‘e bbarcuncielle

dint’ ‘e ccajole ll’aucielle

cantano, cantano p’ ‘a libertà

comme vonno chella libertà

‘stu quartiere ‘e gente onesta

e ca nun vò cchiù ‘e disoneste!

Pe’ nu brutto destino Annalisa

t’hanno stutato ‘o pizzo a rriso!

Ll’organe tuoje sò state dunate

‘stu gesto nobbele grande è stato.

‘Sta città nun s’‘o po’maje scurdà

comme nun se scorda cchiù ‘e te!

Addio Annalisa ‘a bambulella

ca staje ‘ncielo comm’è na stella

e tutt’ ‘e ssere a Furcella fa luce

manna nu poco d’ammore e pace

Fa turnà pe’ sempe a campà

chistu quartiere e chesta città!

Aprile 2004

Massenzio Caravita