el diaolo

Graspa con l'erba Luigia

Stà matina, cò i oci ancora imbogonai e le gambe intorcoade.

Sul fondo de à cerdenza, sercando el paco del cafè, gò visto da meso litro na fiaschetà vèrta,

“Amorosa bianca vendemmia 1988” …… ,

mancava solo un sgiosò, ma svampia nò là jera.

Intanto ntel pontesel dè casa, sè dondolava al ventesel,

l’erba Luigia, che’l so amato ricordando, spandea dà le foje al vento quel’odor de gentil limon .

Beùdo el colonial  e  datamè nà bela sguaratada ai oci,

son tornà in mì e ò scominsiado a ragionar:

sucaro sinquanta grami , 

trentasinque foje de Luigia fra picoe e grandi cavade con amor, lavade e ben sugade, 

solo el sialo de mesa scorsa de linon teron, vegnù da Teracina, drento la botiglieta gò ficà, par dù minuti, gò ben sbatùo e nela cardensa dei liquori ben in vista ò sistemà ,

anquò  04-10-2009  prevision de maurasion fa cira vinti dì, al 24-10-2009 , scurlandola almanco ‘nà olta al dì

I SUGOLI

A’ lè sete de là sera, straco morto,

 da à cantina a casa son tornà,

 dopo aver torcolà chel’ua  chè né a vigna  gavea vendemià .

 Dopo sena, mè viù voja de tastar cosa jera vegnù fora,

 minso dàa fadiga, ma contento, a là mastela son tornà,

 meso litro dè mosto roso gòò ciapà, n’eto de farina in cardensa ghò catà e cò tri curiar de sucaro, tuto gò smisià, sul fogo pian pianelo diese minuti de bojo ghe gò dato, dentro ‘na tarina un’oreta in frigo par chietarlo lò lasà . xè viù fora un sugolo ruspante, forte e coi savori dè ‘naolta.

Ma visto, ch’infondo in boca el lasa quel gusto d’è n’aolta , sì  un pocheto ghè sè sente la farina,

che in bocca liga  con n’arcaico saor.

Par le Tose delicate fie dè là modernità, dove tuto xè gentile e delicato, podaria dar fastidio e alora, dai

ghe femo da fighete ancà stò piato.

De mosto sempre meso litro, nò farina ma maihjzzena, sì dai l’amido de mahiz,

che cò è h e tante z par foresto e affascinante, 30 grammi de sucaro de cana e 20 del nostran, ‘na bustina de vaniglia e…… stà tento che cò’l boje subito l’e coto e in tè un atimo el se struca, in tel frigo falo sempre vegnar fredo.

Eeee  vualà  èl sugolo moderno  par le fighe el xè pronto…. Bon  Ma sensa el gusto da pitochi.

El capon deì copi

Diaolo stà matina sà serà’n cusina,

tra pignate e fornej ghe fumàa’ncà i sarvei,  del capon gaveà da scrivar..

si’nsoma, volio che ve la conta o volio che ve la diga ?

Par farvè a curta,dopo Teodorico  e dopo Rormunda parea chè ì Veronesi la fame gavese chietà,

C’ò’l dei Scaligeri el tempo jera rivà.

‘N’tei rioni la jente laorava e magnava, parche

à veder se scominziava le prime panze e i primi cicioni.

Done, omeni, musi e cavai da castelvecio a  porta palio, zugaa corendo al  palio del drapo verde,

i San Zenati tuti i dì sempre più mati , i gnochi  pareciava  par quel carneval chè là nova era saludava,

In chè’l tempo i Veronesi assai guadagnava

tinsendo le stofe dè tanti colori.

Sui cuerti se lavoraa e sudaa, i tisea in tè  logge e sora le altane distenda a sugarse stè mile bandiere dai sento colori

che al vento cantaa la voja de schei, fra sciapi,

 de grasi colombi e d’usei.

Ma pì stà voja cresea  pì el tempo calava par la taola pareciada,

in tè i orti la salata secaa, l’ua più maurava, nei puinari moria le galine e i cunei, no nasea pì i pulsini,

le vache e porsei in montagna scapava, i bacani jera tuti tintori.

e sicome Makdonald gavea ancora da vegnar, eco la fame  tornar a catarli, jera finido’l magnar, 

Sti sempi orbi dai schei pì’n savea con cosa disnar. 

Ma na bela matina dè stò tempo bislaco ,

fra n’a capesa en camin, se stiraa Gelsomina,

n’a bela, rossa gatina, un po’ tonda dal tanto magnar

parchè se xè vera che rati sui copi no jera, ’l magnar nòl mancava,

sempre catava n’a pasareta o n’usertololeta,

desso ghe jera  sciapi de picionii , grasi e pelandroni.

 Bepi tintor, imirgao da Vicensa par tinsar le pese,

 anc’alora ghe jera i exta comun,

 el la vade e sempio fra sempi el se mete a sigar 

 “gò visto un cunel,.go visto in tei copi un cunel,

le graso come’n capon”

 A stò dir pronta core la Nina, la so mujer,  lal’varda e la dise,

“dai copi non scapa, nol vola e chì sora s’ingrasa par ben, metemolo on tecia, la setimana che vien, come’n cunel.”

Pasadi otò dì, la Nina, Gelsomina fata a tocheti, pasai ‘ntela farina,  col buter in tecia la i mete, ghe sonta fungi e bianchi culi dè carciofo, ghe sonta un bicere de brodo e anca’n goto de bianco,

l’à sprusa d’asè,  la sala e la pevera e là fà cosar n’oreta.

Co lè  cota là suga’l sugheto, ghe sonta tri rosi de ovo e’n pugneto de capari pestà.

Co sto vestitin Gelsomina in tola la porta. Lì la varda e la dise   

  “stà gata la par propi’n cunel”

Da quel dì sta riceta,  che fare se pol col gato ol cunel,

le quela del “gato a la moda dei tintori”, che così  i cusinava

 el capon dei copi.

Bepi e fameia tornadi a Vicenza n’à tratoria se gà piantà,

e el capon dei copi i fasea come specialità

Da quel dì i Visentini    “magna gati”  xè stàdi ciamà …

 e conici xè vendui solo cò a so testa tacà.

LA LEGENDA DE' A PASTISADA DE CAVAL

Corea lento, caldo e straco el  489 dopo cristo, jera setembre, e’l caldo sofegon d’agosto ormai jera pasà, par pitochi e siori scominsiaa tirar chel’arieta fresca che ven zò dai monti,che caresandote el sudor, te mete’n certo sbisigolin nel stomego, sì propri quel che te’n drisa le buele incorcolae da là calura e te fa  tornar la voja del  magnar, pasadàte d’agosto, rimetendote‘n moto le  marteline, lubrificade d’àn bon goto.

Approposito de goti, a chì tempi un serto Odoacre, ex general de Atila e ch’el jera anca Re d’Italia, a Verona el jera coi so Eruli, parchè’l volea  sonarle an certo Teodorico sir dei  Ostrogoti, che’l lò gavea zà menà circa un mese prima .

Incasào come n’à bissa,  el sè grataa  le bròse, insieme cò nà ghenga sderenada, stì soldai, magnava, beea, copava ..e sui  pitochi veronesi se sfogàa.

E fasendo come’l sò maesto,…. l’Atila, …. erba, pomi, rave, e persegoni pi’n fea cresar in ‘ti  campi, insoma Odoacre Verona afamava Drento e fora de Verona, pì nò jera ne cocumari e salata, tirar sengia l’era duro, ma nò jera da far altro.

E stò ostia, che fra l’altro el lè gavea’nca zà ciapae, da lè mura…..” Ostrogoto”…… el ghè zigàa tuto sconto drio dei merli.

Teodorico, là de fora coi so mile cavalieri, de stangarlo zà ‘l pensaa,fin che un  goto de recioto el sé gustava.

Pasà in dì e nè pasa n’altro, un bel giorno Teodorico s’imbriaga e sigando “ te me roto”lancia in resta el se buta su verona… Dio… che finimondo…… jera el 30 de setembre l’ ultimo dì del mese, parea l’ultimo del mondo.

Là fra’l monte e l’Adese subito roso de sangue, ch’intorcolado fra le case,  ’l parea’l volese scondarse da là paura.. pal bordel del fogo, del fumo, di sighi e dei pianti dei pitochi , fin chè stì demòni … pugnaa a caval come diaoli dandose bote da orbi , gà lasando n’tel campo … tuti morti masài,  pitochi e siori, omeni e cavai, par  Verona,  parea rivà  l’ultimo dì … l’inferno parea sé fuse scovercià.

Ma come jera scominsià, dun boto tuto se gà calma.

Chietadi i sighi e chetadi i pianti, restava i stomeghi da’mpienir.

“Teodorico” ……..”Teodorico, novo sire de à cità desfà, desso, cosa ti ne fa magnà? “

Sigàa   pitochi, siori e anca i sò soldà,…..”Che i Eruli, sti cani, fin l’erba nè gà secà.”

Teodorico pensieroso,  shgimando intorno.. le face de sta jente desgrasià,  altro nol vedea,  Che Morti morti e morti, diese sento mile cavai morti …..Ma’l barbaro, pur de far baldoria ghe vien in mente de magnarse i cavai morti, cò’l magnava da puteo, ne là tundra sconfinada.. “Veronesi”  l’orsa …….. “da maganr nò ghe n’ostia, sepelimo i nostri morti e magnemose i cavai parchè i né serva ancor ‘naolta”

Sto popolo afamao el se varda, sbianca in siera, ma bisogna metar ‘n tola, impenir le boche verte de stì fioi che tira la jacheta e rancurado quel che’l jera, mete in grandi pignatoni, el destriero dè la guera.

Del caval el muscolo forte, misiado a poca cicia con fil de graseto tuto tajado a tocheti , su’n leto de seola postado, quela giala, quela forte, tanta come la cicia par confondar lè lagrime ai oci. Dò carote, del sedano, ‘nà foia d’alloro tolta da là corona del vinsidor, un graton de nose moscata, de garofano du ciodi, de canela un tochetin, tuto robào al Venesian che saria vegù tresent’ani dopo.Con Oio e buter se scominsia a far cosar, mà l’onto presto el sè suga e l’aqua nò pòl calmar stà storia, scancelar la memoria e cosar ‘l caval …. e alora..? Dai zonteghe vin, che’l recioto amarone, forte e potente che’l Teodorico bèa  par farse corajo E che a tuti gà dato par stupar la memoria. E alora dai !…… zonteghe vin !…..zonta el Recioto Amarone ….. seco e potente.

Dopo almanco siè ore, de fogo, lento, lento, pipando el bon vin, meteghe’l pevar, giusta de sal e ancora fà cosar zontandoghe vin, fin chè la carne se dresfa divenando un bel tocio .

Po’ magna stò sugo cò à polenta o cò i gnochi, m’anca col pan, sensa far come serti, chè i pensa schifadi a l’equin, ma ricorda che a chel tempo dè stomeghi udi, podèa esar, camelo, struso o porsel o bisteca de soya………. cicia,….. cicia la jera ……….e anquò disemo soltanto…….. xè bona… xè bona e gustosa.

Anca andando a pensar che tra Matoa e Ferara e fin nel Rovigoto, sto piato i fà col musèto …

Voto mai vedar, che lì la guera, a i là gha fàta …… fra maestri e scolari …. Fora dè scola.

La legenda d'èa Pearà

Sta storia lè’n po’ tetra  ma gustosa,

Volio che vè conta… o volio che ve là diga ?

 Adeso vè là conto…….

Jera n’à olta un castel sora Verona,  andò de casa stava el Teodorico, prima ch’el diaolo vestio da caval se’l portase con lù zò a l’inferno.

 In stò logo fredo e scuro dal todescho fabricà, un bel dì Alboino xè rivà.   E  lì la sò femena se more.

Ma el vedovo guerier in t’una de lè sò guere quotidane, un serto Cunimondo gà vinsesto  e senta tanti complimenti, prima la capocia el gà tajà e po’ sò fiola, la Rosmunda, maridà.

 Ala sena de le nose, nel castel de Teodorico, Alboino, cavàdi’ via ì sarvei da là suca del poro Cunegondo, impenendola de vin ciama la mujer  disendo,  mes’ in dialet e mes’ in todesk.:

“Peffi  Rosmunda… in tì là krappa dèl tò pàre ! “

La poareta, dopo’ver beù col stomego strucà, nò gà pì né magnà né trombà.  

La putea però, che santa nò la jera, cò‘un sò vecio moroso,… l’Elmichi, n’a sera da Alboino se fa incantonar e fin che’là ciapa do palpade, la santina ghen’gateja la cinta  còa daga, po’ la ziga,… Elmichi… Elmichi, se tì vol che te la dàga,.. dai ven chì a copàre l’Alboino!

svelto come’lampo l’Elmichi, con en colpo ne là pansa , copà lì el so RE …sperando in tè’nà tromba soprafina, ma co’l ghè là dimanda, a Ravenna la lo manda a fars’anca lù copar.  

E la pearà disarì n’do che là stà ?

E desso con calma,  beo’n goto e ve la digo 

La Rosmunda da stì fati, n’tel stomego snojada, anoressica  doventada,  lessi e rosti  la snobava  

Ma ‘n gran cogo benedeto, un dì, ciapà de tera n’à teceta, mete drento una mica de buter e’n bel toco de miol, c’ò un sbarluso de fogheto, pian pianin jè fà desfàr , c’ò i scominzia’sfitajar … sora el ghè fioca pan vecio, gratà fin, tuto de pan bianco sensa struto, oio o altra consa  ma scartandoghine la grosta.

C’ò stà misia xè impastada, pan, buter e bon  miol, el la nega con’ tè’n  brodo soprafin de gaina e de vedel,  fa ‘nà crema molesina,  che tre ore fà  pipar…an sbalume de fogheto, misiando pian pianelo  solo sora,  par la grosta no svejar, chela grosta soprafina che sé staca tuta’n toco da là teja co la salsa xe finia. 

C’ò fù cota, con dè sora nà pelesina infisetada  e par soto la sò grosta ben formada e nò bruzàda, zò n’a bela informajada e gran del pever Venezian . 

Po’ sto cogo in’tun piato largo e piano, c’ò sta papa impeverada  el Coacia par de sora la gaina e’l bon vedelo,  el ghe nega la tremola testina,

el marida ‘l funate codeghin c’on l’impudica tetina, el sofega la lengua col nerveto,e con stà fumante delissia  che mandaa udori e saori  che podèa  solvar parfin le tete de la regina D’olanda

 e’l va da Rosmunda,“ tasta… tasta… mia regina, che stà salsina te solea’ncà la petorina”

 L’anoressica,  slarga le nasele, usma stì saori e tastada la pearà,  con’el  fogo nè la pansa, le pietanse la divora, 

c’ò la boca ghè sé svoda,  eco.. eco… la regal parola…. 

Alboino! Cunegondo!  ‘nd’è a remengo, stò magnando un bon lesso c’ò a pearà, caro Elmichi el codeghin xè questo quà.

E da quel dì là pearà xè stà inventà

Ricordo de dù amissi pi veci de mì

Nico Buono e Marisa,

 lui famoso per un gossip scandalistico negli anni sessanta,

lei La Musa ispiratrice,

entrambi Veronesi 

Vorrei che avvenisse in un pagliaio enorme,

in un’estate che disfa,

con sgangherati suoni di fisarmonica

e voci dal vino scoscese

che arrivino da un’aia lontana. 

Sprofonderesti con golosa beatitudine

Fra stupidi occhi di galline curiose

E riavrei subito

La sepolta forza bifolca. 

Poi, in quei tepori umili e vasti,

legheresti per sempre

i miei contrasti

VIVERE ARDENDO E NON BRUCIARSI MAI

In stì jorni, serti fati un poco me gà turbà, fati de ciacoe, roba da poco a dir el vero, robe che me ricorda c'ò nà olta a disesto la me amiga Follia :

 “ è merito mio se si vedono in giro certi vecchioni dell’età di Nestore, che non sembran più nemmeno degli esserei umani, malfermi, balbuzienti, sdentati, canuti, calvi o, per desciverli alla maniera di Aristofane :  “”puzzolenti, curvi, miseri, tutti rughe, senza peli né denti, senza virilità.””  C’è allora chi si tinge i capelli di nero, chi nasconde la calvizie sotto un parrucchino, chi sfoggia dentature da cinghiale, chi s’innamora pazzamente di una ragazza e si strugge di desiderio come un giovanotto.Non è raro il caso di un vecchio decrepito ,che si prenda in moglie una ragazzina, povera in canna (la quale si poi consolerà altrove), anzi, è diventata ormai una moda.E’ ancora più sollazzante è sentire certe nonnette che sembrano cadaveri viventi tornati dal regno dei morti inneggiare ai piaceri della vita. Sono capaci di pagare profumatamente qualche Faone perché si presti al loro piacere, si imbrattano il volto di creme, trascorrono ore davanti allo specchio, si depilano in mezzo alle cosce e fanno di tutto per nascondere la realtà, magari mettono in mostra anche con scollature eccesive il seno armai avizzito e cascante. Con voce tremula sussurrano paroline d’amore, alzano i calici, si mescolano alle danze delle giovinette e scrivono bigliettini amorosi. Il loro comportamento suscita ilarità ed è giustamente ritenuto folle. Ma è un piacere vedere delle donne così anziane contente di sé, ubriache di voluttàe,grazie a mè la Follia , felici.E’ vero, si mettono in ridicolo, Ma voi che siete i primi a schernirle pensateci un po’ su : è meglio vivere come loro, pazze di gioia, o buttarsi disperati da un balcone con una pietra al collo ?Se poi la gente trova indegno il loro modo di vivere, ai miei beati svampiti non importa.

vecio proverbio veneto dè diman

DONA NANA ... TUTA TANA

Vecio proverbio veneto dè anquò

"Rossa de peo, mata par l'oseo"

L'oseo

Un dì d’agosto n’useleto sfiacà dal caldo,

al frèsco de nà cesa se rifujà a’n boto in punto, a mesa granda.

E c’ò a scalmana ghè sé gà calmà a sigutat e piucar gà scominsià..

Pio…. Piopio…. Piio…. Piopì… piopio…..

 El’ preosto in gran parecio, si quel dea dominica,

sentendose disturbà, se ferma, se volta a la platea e con far solenne el dise..

 “Fedeli questa xe la casa del signore chi ga l’oseo per favore, esca”

as to dir i omini sé alsa

 mal’preosto visto el movimento replica tosto

“fratelli miei carissimi sedete, male mi capiste, chi gà ciapà l’oselo esca”

 a stò dir cavade  sie beghine dala pele a tartaruga che cò a lengua suta e diei streti a pugno che xè resta sentae, le done e le utele tute , comodada le veleta le se leva

  “sorele mie carissime, noooo restè sentade ancà vualtre, nò metime inbaraso, dir voleo, chi gà ciapà l’oselo in cesa esca”

 a sta frase le muneghe in volto le sé sbianca, qualcheduna la vacilla……… cò’l sé acorse’l replica in cariera

“sante donne ofendarve no era mia intensio, scusime se mal me gò spiegà , chi gà in man l’oselo in cesa in sto momento , esca”

 à sto dir du tosi in fondo de la cesa se varda, e ela a lù ghè die “Bepi, tè gaveo dito ch’el né gaveva visto”

La poenta infasiolada

A granda richiesta visto che xè fredo ecove la poenta infasiolada col parecio pì forte :

 •Meti sul fogo ‘nà ramina con drento l'acqua sia par cosar i fasioi chè là poenta, che la gà d’eser dò olte i fasioi, dopara  fasioi borloti anca se n’aolta i usava i fasioi gnochi.

 Quando l’aqua la sfrotola, zonteghe dela panzeta sfritajada con tanta zeola e’l s’oio, la sale sia pai fasioi che par la poenta e poco pevare.

C’ò i xè coti, buta drento la poenta e misia con bonagrasia in continuasion, dopo mes'ora la doaria eser cota, tienla molesina me racomando, rabaltela sula panara e magna,  magari c'ò è costine bele onte o cò è salcice .

.

Pultie e Formenta

Precisasion in lingua Dantesca

picoà storia dè a Poenta

Mà desso pian femi tuti, gavemo da far un pocheta de storia, anca par  capir sà xè stà Poenta. 

‘Nà  pianta che in Merica iha ciamaa  Mahyz che i dopraa per far roba da bear .

Coi bastimenti de spagna intorno al 1500  prima i la porta  ‘tel’Africa  da lì in  Turchia dan do’la riva a Venesia . 

L’è’l Sorgo Turco si’l formenton, quel che desso in talian l’è ciamà granturco. 

La trovemo nominaa nei libri  fin dal 1565,  el Mattioli po’’l scrive ne le so memorie chè sta pianta de origine Mericana la jè  de vari tipi, granda, mezana e pìcia , e chela pol averghe i grani  de diversi colori : zalo, bianco o roso che se trova ancora in zerte valle del Trentin 

Nel mileziesento i scrivea chel’Sorgo Turco mazenao, el fasea ‘nà farina  megio de quela del mejo par far polente e dèle olte anca mejo del quela de formento par far el pan. 

 Apicio parlando di veneti ‘l disea che i fasea dele spece de pastoni coti, col mejo o col farro, poente insoma zà alora, dopo che i me conta che sia stà i Bergamasci i Veronesi i Padoani gà poca importansa. girea o miscela sempre poenta xè : acqua che gnente costa, sal che’l costava,  poco me recomando che tanto el costa e farina de Sorgo Turco che tanta ghè né jera, boida fin che la vien fisa.

La jera bona par sfamar con poco i agricoli veneti, che i gavea trovà n’a roba economica par calmar la fame  che da sempre i gavea.  “nemo a ciapàrse a poenta” i disea, el pan l’era roba da siori. 

Ma cò’ ela xe  rivà anca a pelagra, vento n’tel stomego jera forse bona par n’à dieta de anquò ma ieri invese i disea…  “poenta e puìna pì che se core e manco se càmina”

 El formenton gà  portà anca la nassita dei filò, sere e sere nèlè stale a scartosar i scartosi dèlè panoce,  coi so canti le fole  ando’e la poenta la fea fin politica, ve ricordio che a scola i n’egavea contà de la terribile sconfitta de Lipsia……  vergogna anca deso de la marina italiana ?

Le navi austriache le jera armade de marinari Veneti e Istriani, e nei filò i cantava :

“su corriamo in batalioni – tra la renghe e i scopettoni – la polenta sensa sal – ma’ l Re va in fondo al mar !”  sercando d’è ricordar  c’ò zerà a serenissima e sbatendosene del novo regno piemonteso. O Talian chi i disea anca “ciameme can ma nò Talian” 

Nei filò tosati e pute complice la scarsa illuminasion rivivea quela libertà del sesso che gera  sempre stà Venesia e ne le so terre, a dispeto de quel re Papa doe i cantava c’ò le cascà “viva Maria Giuseppe e Gesù ‘l governo dei preti non el ghè più “

POlENTA poenta e poenta

E’cussì sè xè vèra  cò gà dito el Joice :

Dio gà creà el magnar,el diaolo e i coghi.

Mì diaolo, d’adeso vè contarò : de magnar, de diaoli e de coghi.

Scominsien dal “Bepi poenta” poareto,

chè cò n’à mujer che parea n’à ‘ cavreta : picòa, basabanchi e sèca,

i veci n’aolta disea :  tre robe nò’và ben sechè : cavre, femene e oche,

e chè a ogni palpon la se spostea, con’segno d’è crose e supiandoghe dòso n’ave gloria.

La matina poareto 'el catava : POENTA A COLASION

Rancura la poenta del dì prima, faghine dei tocheti grandi: un deo par un deo e alti alcora un deo,

sfrisili un poco ne’a farsora co’n poco de buter dopo averli scarioltolali  ben ben nel zucharo,

 magnali dopo averli messi in’tèn piato, con butà sora del buter fato vegnar moro e fichegè anca n’à gosa de porto o seco marsala, meso a la fine…,

 ……..jè come dolzeti i ze magna cò’è man,

ma se te vol el stomego impenir, bei caldi buteli’n’tènà scudela de bon late fredo,

s’taolta doparè el cuciar par magnar… porsei !! .. dizimela o contimela dopo averlì sajà ……

Strucon d'è sarveo

Cò’l naso levà, i brasi incrosà e le ciape strucàe, son chì,! che pènso……

 “ma chì me o fà far..? de portarve rispeto, de darve ricete, de starve a scoltar”.

 Ste quatro savate che gran fighe se crede, le ‘dopra le foto dèe altre, ma  le parla, le stiga, sui blog le je tute spoiade…. Je pronte… sol par  la copula a ciacole.

Je come ch’el tale, che col cul del’sò amigo, el culaton voleà fare.

È sì… ormai anca la Maria Sbregapateloni …. La gà ciapà el morbo de la Maria Goretti….

 Hahahahahaha e mi poro diaolo cì porto a l’inferno ?

‘Ste quatro beghine ?

Ha gò anca pensà :“Dai dai moneghine invese de sesso parlemo de cesso, de scorese e de merda !

un’intrigante .... silensio perfeto,…. gò catà

E’ quà par trasgredir sol de magnar a gò dè parlar, cussì almanco cò’ done rotonde parlemo de tola e nò se sà mai che girando in cusina, frà’n piato de pasta e un goto de vin…Ghè posa scapar n’à trombadina…

E vù omeni….. amissi…. me racomando…contegno Nobilomini, vardive ben in tel' speiò  ha zì bassi e zì grassi o pèzzo.. zì baucchi e dal’età imbalonà.

Basta strapegar le lengue par tera al primo odor de papusa,chè se pò ‘è sèla tira,. Vardì che pur’ela la spuzza.

Lode a la Scoresa

Carissimo amigo, valente avocato, na lode a le merda con arte t’è fato.

T’è fato na lode che val un tesoro: te si proprio un vero maestro del foro.

Mi’desso defendo, pur sensa pretese. Le “gran maltratade “ vòi dir le scorese.

La merda l’è merda ghe poco da dir, l’è proprio da stronsi voler contradir.

Ma almanco na rima la andava ben spesa par metar sul piato la pora scoresa.

La gente distinta ghe dise porcon a quel che scoresa: No l’è educasion!

Mi so che a le sconte, la gente educada, la mola de gusto la so scoresada,

metendo da parte la bona creansa parche la scoresa desgropa la pansa.

Me piase da mati quel to sentimento: che quando te caghi te resti contento.

Ma ti, scoresando, amigo Angelin più arioso e ligero te vedi el destin.

Machè tranquilanti  ! magnemo fasioi e po’ scoresemo: l’è qua che te voi!

La merda l’è merda nissun te la toca, Ma si l’è presiosa sia fresca o patoca.

L’è’l sal de la tera, l’è forte, l’è varia, ma l’è la scoresa che domina l’aria.              

D’acordo le merde je picole e grosse, però,caro amigo. ghe manca la vosse.

E se de le merde ghe n’è tante specie te cati scorese par tute le rècie.

Gh’è quela che tase: bison star a l’erta chè quela l’è proprio na brasa coèrta.

La nasse de sfoso, la sloia a l’inglese, la fa vègnar gialo piassè de un cinese.

Gh’è quele dei bocia che je ancora tate le par che le g’abia la boca da late.

Gh’è quele che mola le fiole e le spose: che jè ciaciarine, che jè caprissiose.

Gh’è po’ le scorese del bon manoval che solo a sfiorarte le pol farte mal.

I furbi avocati g’à quele che spela e par vègnar fora  le vòl la parcela.

E quele dei preti le vien de scondon lassando ne l’aria na benedision.

Le sane scorese tirà dai dotori le tien le distanse, l’è roba da siori.

Ma quele purtropo, del poro impiegato passà el vintisete le perde de scato.

Gh’è quele vestide un p’ò liquidele: bison star atenti. Frenar le fisete:

infati i vecioti dei prosi che perde i tira scorese ch’jè peso de merde,

e ne le mudande, al posto del bol, ghe sbrisia cagade che impiena un parol.

Ma zà la scoresa gaiarda e sovrana l’è quela sincera, l’è quela nostrana,

l’è quela che canta che vola nel cel, che quando l’è fissa la sbrga el bavel.

Bison che dichiara, par la precision, che’l cul scoresando nò’ fa ondulasion:

no l’è gnente vera che co na scoresa te pol vegnar risso sparando la spesa,

infati me nono che avea provà da risso che l’era’sa tuto pelà.

L’è vera par altro, che sensa la boca se pòl ben capirse tirando na coca:

e che ciacolade fa un proso da mul: siben che jè sempre discorsi da cul.

Infati zò a Roma gh’è tanti bei siori che i parla i straparla po’ i bèga tra lori

E i fa un gran casoto, e i fa un gran sigàr, ma dopo i g’à’l vissio che i torna a parlar.

Saria la fortuna del nostro paese se a boca serada i tirase scorese

Creando’n ambiente più vero e intonà, vestendo de spussa quel casso che i fa.

La merda l’è merda, amigo avocato, per questo rispeto la gente de stato.

Capisso l’impegno, le pètole, i sforsi, le gran fadigasse par farne ……discorsi.

Adesso no i magna, no i beve e no i dorme pensando a la pila per far ……le riforme.

No so ci m’à dito che i g’à la pretesa de metar na tassa par ogni scoresa.

E qua me parmeto de dirghe che i sbalia, saria la rovina completa d’Italia:

infati tassando la vose più onesta, vòl dir pipolàrghe quel poco che resta.

Te robo del tempo par farme scoltar, se ocor te gh’è prèssia de andar ……. a cagar.

E alora, concludo con sìe parolete le “ gran maltratade” le sia benedete!

Le canto e le scrivo che tuti i le lèsa. E’deso, parmeti, bison che scoresa.

Monaldo Tòdaro

Lode de' l'ecelentissima merda

La merda mi canto, umano prodotto e ci ghe da contro che i vgna pur soto.

Che alora ghe spiego, con tuto el mefià el bene infinito che al mondo la fa..

La merda mi canto che tuti i dispersa : la merda più mola, la merda più spessa..

La merda che el proso de tuti fa fora :la merda più giala, la merda più mora..

La merda che, ansiosa, sospira la dona, par vedar se el corpo del fiol.. el funsiona

La  merda che,a farla,te da quei momentiche smorsa i pensieri,che rende contenti.

Davanti a la quale sparise ogni ceto: la caga el siorasso,la caga el poareto:

soltanto che quela cagà dai pitochi la g’ha più polenta, la casca zò a tochi,

e quela dei siori che i g’hà piu cusina,l’è piùslaquarisa, l’è più molesina …

la merdade tuti insoma mi canto: de ci caga poco, de ci caga tanto:

la merda dei grandi, dei mostri da fase; merdine, merdete, merdone ,merdasse!

La merda l’è merda gh’è poco da dir,e a tuti a sto mondone toca…. Tartir !

Ma a quei delicati che de ela se lagna, dichiaro e dimostro che tuti ….la magna!

Nei pasti che ogniuno smorfise ogni giorno l’è sempre la merda che fa .. da contorno:

le bele pietanse opur quele brute un poca de merda le ghe le g’ha tute.

El manzo, gen cicia,che tuti ghe tien, el fa le culate parrchè’l magna el fien,

ma el fien,po’,l’èquelo che el bon contadin el fa vegnar grando con merda e pissin !

i grassi polastri che g’ha quei galini, le anare i piti, opure i caponi

i o visti de spesso,becarse contenti le bele merdine cagà dai parenti,

slargar con le sate la merda più grossa, sercar con el beco par torse… qualcossa:

chè, anzi, ricordo che un galo g’avea tegnù così neto che sempre el tasea,

ma un giorno che’l m’era scapà sul luamar quel galo, da muto, s’à messo a cantar..

la bela polenta che a tuti ghe piase e, specie a Verona l’è in tute le case,

la vien bela granda la fa la panocia. Parchè sul luame le piante le pocia:

e in tuto el luame, a quanto mi so, g’e merda de vaca e merda de bò’….

E quel coloreto de quan l’è maura no credo che’l sia color de natura,

parchè, par natura la restaria verda: l’è, invesse, gialota…ghe entra la merda!

Quel tal che g’ha nome ingiusto, de “porco” se ingrass soltanto s’el vive in t’el sporco:

lasselo pur neto,privèlo de merde e invese de farla la cicia el la perde….

Ma invese infanghèlo de merda e de pisso te’arè che cul grosso,te’arè che cul fisso:

lassè ch’el se sossola in mezo a la bole te’arè che petara, te’arè che brisole…

se ci magna merda se ciama porsei de semo un fià tuti par via dei osei:

e infati magnando le passere, bele, insieme co’l resto va zò le buele:

ma de le buele la boca fa uso parchè i stronsi i ciapa la strada …del buso:

cosita fasendo de osei na magnada magnemo anca i stronsi fermà..par la strada!

E via de’ sto passo che mi podaria parlar par un ano de’sta smerdaria….

Da quando che Adamo l’ha fato pecato magnando quel pomo che Eva g’ha dato,

dal giorno che, insoma, par via del pometo al mondo è vegnudo el primo stronseto.

La merda l’ha fato un nome catio parchè la vien fora soltanto de drio:

la merda mai ‘vudo no g’ha simpatia par quela la spusa che fa scapar via:

e tuti guardando da indove la vien no sente la forsa de dirghe de ben,

e tuti sentendo sto efeto fetente l’à sempre creduda na bona da gnente….

Ma adesso, si, basta: adesso l’è ora de no guardar tanto da indò la vien fora :

adesso l’è tempo de darghe n’ocià al bene infinito che al mondo la fa,

e mi spero tanto, cantandola in rima de averghe refato un poca de stima….

  Angelin Sartori

zèna dè rota o gasega

Quatro brachi…… senza femene…. Diaolo,  Cornelio, Toni , è’l mona de l’astemio che à sol da guidar, che par zènar, i bordesa su la via , fino a l’ostaria,

Cò al’osto semo rivà, do cicioli svelti,  quasi robai, par la foga

 Ghemo magnà, de scondon del colesterolo cagnon, pò

n’à seoleta en pearon, ‘nà polpeta, ‘nà feta e sopresa, n’oliva ,’naciuga tuto misià con dò ombre de vasel par farlo comodar,………… fin che a tola no se ghemo sentà.

Ed’eco ch’el riva… dentro in ten piato.. a montagna , caldo, fragrante, spandendo l’udor de canela fin chel ciama el  formaio  a starghe da rente,

mostrando del salado i ciceti misiadi ai risi sgranai ,

 Sua altessa …..  el risoto a la pilota.. col tastasal ………el’zè’n tola….

Un piato….du piati…..ocio tosi! calmive…. ‘nò ghè pi posto pa’ leso!

Ma ‘nà generosa quantità del moro mantoan che sfrigola nel’goto, el nè comoda el gargoso.

 E dai semo in zona dai tasten anca’n tortelin… nò’ de Bologna quei xè grossi e volgari….

Quei nostri chè se ciama “nodi d’amor”….. lezzeri,….. de pasta finissima, col’ripien che sa dè moscata misiada al vedel,…. col pevare, salvia, buro e formaio a conzar…..

Ma sìì ..dai sofrimo anca s’tò sforzo……

porta ‘nà bosa de Bardolin joaneto ch’el vaga zo lezero, senza coverza  ma maridandose al gusto de sta delicatessa…deso faria un paragon…ma… nò podì … me diresi sbocalon…

 E dopo……tajadi a tocheti, fumanti e bolenti ……..

nerveti, testina e codeghin, magnai col sal groso, mostarda e col cren

la lengua in du modi ….la natural cò la verde salsina e da sola quela al samistro

‘pò ‘nà feta de manso con fil dè  graseto…bela  coverta da mora e fumante pearà

e pò par ricordar i tempi poareti un toco de galina e ‘nà feta de tetina coi resti de’la pearà

robandose a crostina come faseine da puteleti..

Osto! dai!….. portene un valpolicella ma che’l sia classico….. el superiore o l’amaron i xe tropo pieni .....sta delisia và gustada e bagnada con un vin che ghè stàga’l pari …..dunque un conte superiore, un duca de ripasso, massa forti ……e peso ancora su’eminenza l’Amarone

 Par finir stracàde ormai le marteline, col stomegoo imbugà  el fegato sofegà,

dai denghe nul’ultima botà……..

dolzi de crema ala moda Mantoana…….ma…… sotto messi da nà bosa del Ré Recioto .

 scapa cafè!! ….. te me sasini i saori che ancora gò in boca…….

Vien graspeta…… compagneme in leto col pisigor de lengua del to saor vecio………….

 Mà naolta in’tel leto l’unica amante che me consola ………. lè ‘nà broca de acqua e citrato