CARMEN AULETTA

Nun ce penzà

   E maje nu suonno è stato accussì ddoce

comm'a quanno me diciste:

"Assiettete cca, stamme vicino,

guardammo chistu cielo ca ce cummoglie,

'ncopp'a riva ‘e stu mare ca ce ‘nvonne ‘o core,

 sta lacrima è salata e dancella 'o mare ca ce piace.

Vien'accà...azzicca 'o core tuojo ‘ncopp'  ‘o core mio,

nun vide ca songono na cosa sola

 e tu nun ce può ffà niente?

Falle ‘e stà accussì,  staje sentenne pure tu

chello ca se stanno dicenno sti dduje core?”

“ Si,   e stongo sentenno ,

 famme mettere ‘a rrecchia cchiù vicino,

zitto, famme sentì, 

nun me voglio perdere na parola.

E comme se fa mò?

Mò ca chisti dduie core s'hanno a lascià?

E tu me diciste:

 “Nun ce penzà ,

 nun tenè stu pensiero,

 niente e nisciuno ce l'ha dda levà chistu mumento,

guardame...  aizza ‘a capa,

 sta vocca toja sta tremmanne 'e passione

 e io … nun ce'a faccio a nun te vasà!”

 Carmen Auletta