Ambra di stelle

Vogghiu spenniri sulu du paroli,
pi sfatari prigiudizi e dicirii cumuni,
ca diciunu ca li siciliani,
sunnu genti mafiusa, disonesti e strani.

Diciunu ca nun avemu vogghia di travagghari,
semu tutti na famigghia e ni facemu mantiniri,
siamu arritrati, di nuatri nuddu si pò fidari,
siamu sulu cutedda, lupara e malaffari.

A sentiri sti cosi mi sentu mali,
e nun pozzu cchiù lassari iri.
Di puitissa, allura facitimmillu fari
difennu la me genti, pi putilla affrancari.

Sempri lu sicilianu parti all'avvintura,
si porta, li sò sonna e la mentali apirtura.
Cumincia di zeru e cu caparbietà,
dimostra sempri li sò innati qualità.

Lu trovi a tutti banni, a li posti di cumannu,
unni vai, vai, na l'anguli spirduti di lu munnu,
ni li fabbrichi, li scoli, dutturi e scienziatu,
fa l'atturi, lu poeta, lu filosufu , avvucatu...

Avi lu cori ranni ginirusu , liali,
a porta sempri aperta, sempri ospitali.
lu sicilianu havi lu sensu di l'onuri,
mori pi la sò genti, a sò terra nto cori.

Lu nostru sangu è mistu, fattu di tanti razzi,
tanti duminazioni, surprusi e amarizzi.
Aiutamu a tutti, fratuzzi pillirini,
arrivanu di stati a nuatri vicini.

Damu esempiu a tutti di ranni civiltà,
ni stringiemu nsemula cu tanta umanità.
Semu sempri n'manu di disonesti avvoltoi,
ca cà, n'Sicilia fabbricanu mattatoi.

Nuatri avemu lu mari, l'etna, li vaddati,
ranni testimunianzi di civiltà passati.
Nuatri semu chisti, nun lu scurdati,
Siciliani veri, semu d'amuri mpastati!