SA BELLESA DE SAS PRESENTADAS
de Frantziscu Casula
Cun sa Presentada de “Carlo Felice e i tiranni sabaudi”, de eris in Tortolì
semus arribados a 183. Proite m’agradant meda meda? Nessi pro tres resones: 1. Sa ‘e una: mi permitint de chistionare de s’istoria sarda, cuada e interrada dae sos libros iscolasticos, cando no est trastocada, afalsada. Totu s’istoria sarda ma mescamente cussa chi pertocat su dominiu de sos tirannos sabaudos. Est custa chi conto in sas presentadas, partinde dae su libru. Conto sos degoglios, sos disacatos sa titulias chi nos ant fatu in 226 annos de isfrutamentu e de scontroriu e repressione militare: nos ant bochidu o impresonau sos mezus omines chi teniamus: amento pro totus a Franciscu Cillocco e Franciscu Sanna Corda e a sos martires de Palabanda. Nos ant destruidu e isperdidu sos padentes. Nos ant carrigadu de tacias e de impostas, de cale si siat zenia. Nos ant proibiu e privadu de sa limba e de sa cultura nostra, identitaria e comunitaria e, comente cantat Frantziscu Innassiu Mannu in s’Innu “Su patriota sardu a sos feudatarios”: “Dae sos archivios furadu/Nos hana sas mezzus pezzas/Et che iscritturas bezzas/Las hana fattas bruiare”. 2. Sa ‘e duas: mi permitint de atoviare mizas e mizas de sardas e sardos, de discutere e de mi cunfruntare cun issas/sos. E de imparare. Presentende su libru in Bono apo ischidu comente si jamaiat sa femina paralitica chi sos sordados giannitzeros in su 1796 (19-20 de triulas) ant istupradu e bochidu “dopo averle strappato le mammelle”, iscrient totu sos istoricos. Si jamaiat Maria Ambrogia Soddu. A Thiesi, sos istoricos locales m’ant imparadu bene ite est sutzedidu su 6 de santu gaine de su 1880 cando arribados dae Tatari 1500 sordados de sos savia: ant brusiadu sas domos, ant bochidu e istupradu sas feminas chi pro si difendere sunt istadas custrintas a impreare “spiedi arroventati e grossi bastoni” goi iscrient galu sos istoricos de tando. Thiesi amenta gal’oe, cad’annu cussu fatu cruele chi mutit “Sa die de s’Atacu”. 3. Sa ‘e tres: peri custa resone est, pro mie de importu mannu ca mi permitit de atobiare ex dischentes, cumpangios de iscola, amigos, paesanos chi mancari non bidia dae deghena e deghena de annos. E semper est un’emutzione manna. Carchi annu faghet in Cheremule apo oviadu unu cumpangiu de iscola media chi non bidia dae su 1959: dae prus de 60 annos! E ite piaghere mannu cando atobio ex alunnos chi mancari apo tentu in sos annos ’70/80! Pro no narrere s’emutzione chi proo cando ovio zente de Ollolai, sa bidda mea: m’est capitadu finas in s’urtima presentada de eris in Tortolì cun Antiocru Soro; o amigos: eris semper in Tortolì est bennidu a sa presentada Gonariu Lorrai (jai assessore regionale cun sa Giunta de Palomba): amigu meu istimadu chi non bidia dae prus de vint’annos! Pro totu custas resones chergio sighire cun sas presentadas: si Deus cheret e sos caribineris lu permitint!
Invio
Scrivi a Francesco Casula
SA BELLESA DE SAS PRESENTADASultima modifica: 2024-02-25T11:39:23+01:00da