LA VOCE DI KAYFA

Ce vo 'a ciorta pure a murì!

Dinto ‘a vita ce vo ‘a ciorta

nun sulo pe’ campà

ma pure pe’ murì!

Accussì comme c’è sta chi da ‘a vita ave

denare, salute, gioja, ammore
comme se niente fosse,

quasi ca tutt’ ste ccose bbelle

ll’appartenessere pe’ diritto,

accussì c’è sta chi more senza suffrì,

pazianno cu ll’amici,

magnano ca famiglia,

ciacieannese sotto e lenzole cu ‘na bella figliola.

Ma a morta cchiù serena

penzo adda essere

chella ca te coje mentre ruorme:

te cucche ‘a sera dinto o lietto

e te scita ‘a matina all’ato munno

senza sapè né comme né pecché!

È overo, ste morte ‘mpruvvise

so belle pe’ chi ‘e subisce,

nun certo pe’ chi ‘e patisce.

Sai che strazio adda esse’ pe’

‘e pariente, ll’amici, l’amante

vedè ca ll’ammore se ne è juto all’intrasatta

senza manc’ salutà?

Loro chiagneno, se disperano pecché

nun po’ essere overo ch’ ‘a felicità e l’alleria

nun ce stanno cchiù.

‘A sufferenza lloro è naturale

pecché nisciuno,

pure sapenno ca ll’ommo è nato pe’ murì,

accetta ‘a morte comme ll’unico destino

capace ‘e rennere ll’uommene

uguale l’uno cu ll’ato.

Nisciuno penza a quanno è stato furtunato

chi se ne juto accussì,

chiurenne semplicemente ll’uocchje

comme se ‘na mano ‘nvisibile

avesse tajato cu ‘na forbice ‘e file da currente

che ‘o facevano campà.

Nisciuno penza a tutte chelle perzone

cundannate a schiattà dinto ‘a nu lietto

miezo a tante sufferenze,

spisso sputann’ ‘o sanghe ‘a vocca,

prianno Ddio ‘e se chiammà

pecché nun c’ ‘a fanno cchiù a campà!

Nisciuno penza a tutte chella gente

custrette da nu destino nfame

a s’ a attacà a ‘na machina

pe’ respirà o pe’ magnà

mentre l’uocchie lloro

ll’unico cielo ca verene ‘e ‘o soffitto,

ll’uniche stelle ca l’allummeneno ‘o surriso

‘e 'a luce do lampiere appiso ‘ncapa a lloro.

Nisciuno penza a chilli disperate

ca doppo avè jettato o veleno

‘na vita sana a faticà

pe’ purtà nu piezzo ‘e pane a casa

pe’ dda ‘a magnà ‘a famija,

ca iennesene ‘n penzione

se putessere finalmente arrepusà

e godè ‘nu muorz’ ‘e vita,

su cundannate ‘ a suffrì pure pe’ murì

spennenne ‘a penzione pe’

mmericine, duttore e ‘nfermiere

mentre se ne stanno ciuncate dinto a nu lietto

cu ‘a  cerevella che ddà ‘e nummere,

cunfonnene ‘e ricorde e e nomme

comme ll’uojo dinto all’acqua;

abbuffate ‘e fetenzie

pe’ vocca, pe’ culo, pe’ dinte ‘e vene

e a vote pe’ ffino pe’ dinte ‘e recchie

da mane ottuse

ca cunfonnono ll’ammore cu l’egosimo,

convinte ca ‘a pace da morte

fa cchiù mmale de’sufferenze

‘e ‘na vita senza vita!